काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी)ले दुई जनालाई पक्राउ गरेको छ ।

सीआईबीको टोलीले बैंकिङ कसुरको मुद्दाका २ जना फरार प्रतिवादीहरूलाई पक्राउ गरेको जनाएको छ ।

पक्राउ पर्नेहरूमा तनहुँ जिल्लाको ब्यास नगरपालिका–९ वतन भई काठमाडौं महानगरपालिका–२६ सोह्रखुट्टे बस्ने एम.एम. कन्स्ट्रक्शन प्रालिका संचालक ३२ वर्षीय सुरज गुरुङ र सिन्धुपाल्चोक घर भई काठमाडौं महानगरपालिका–३१ तीनकुने बस्ने ३६ वर्षीय सुमित भण्डारी रहेका छन् ।

उच्च अदालत पाटनको गत मंसिर २४ गतेको फैसलाले सुरजलाई २४ दिन कैद र ७२ लाख रुपियाँ जरिवाना र सुमितलाई २०७७ मंसिर १३ गतेको फैसलाले ५ दिन कैद र ९ लाख ७३ हजार रुपियाँ जरिवाना ठहर भएको थियो ।

सुरजलाई आइतबार काठमाडौंको गोंगबुबाट र सुमितलाई सोमबार लाजिम्पाटबाट फेला पारी पक्राउ गरिएको हो ।

उनीहरूले आफ्नो खातामा पर्याप्त मौज्दात रकम नभएको भन्ने जानी जानी पीडितहरूलाई झुक्यानमा पारी आ–आफ्नो बैंक खाताबाट भुक्तान हुने भनी चेक दिएको ठहर गरी उच्च अदालत पाटनले उक्त फैसला गरेको थियो ।

फैसला कार्यान्वयनका लागि सुरजलाई जिल्ला अदालत ललितपुर र सुमितलाई जिल्ला अदालत भक्तपुरमा पेश गरिएको उक्त ब्यूरोले जनाएको छ ।