काठमाडौं । निर्वाचनमा कांग्रेसको पराजयसँगै देखिएको आन्तरिक विवादले उग्ररुप लिँदै गएको छ ।

सार्वजनिक कार्यक्रमहरूमा एकले अर्कालाई आरोप प्रत्याराप लगाइरहेका बेला वरिष्ठ नेता रामचन्द्र पौडेलले पार्टी सभापति शेरबहादुर देउवामाथि अर्को गम्भीर प्रश्न उठाएका छन् ।

ललितपुरमा आइतबार बसेको केन्द्रीय कार्यसमितिको बैठकमा पौडेलले लिखितरुपमै आफ्नो धारणा राख्दै देउवामाथि पार्टीलाई उठ्नै गाह्रो हुने गरी लथालिंग हालतमा पुर्‍याएको आरोप लगाएका छन् ।

पत्रको सुरुमा नै १३ औं महाधिवेशनलगत्तै आफूले भेटेर समूहको संरक्षक होइन, सिंगो कांग्रेसको बन्न आग्रह गरेको स्मरण गर्दै वरिष्ठ नेता पौडेलले भनेका छन्, ‘तर, तपाई तयार हुनु भएन । परिणाम आज के भयो ? कांग्रेसले कांग्रेसलाई हराएर आनन्द मान्ने ठाउँमा पुग्यौं ।’

पार्टीको सबै निकाय, भातृ संगठन अस्तव्यस्त रहेको भन्दै उनले पार्टी सभापति देउवालाई प्रश्न गरेका छन्, ‘तपाईले के गर्नुभयो ? एउटा काम तपाईले गर्नुभयो(आफ्नो गुटको भरणपोषण’, पौडेलले भने, ‘हो तपाईको आफ्नो गुट मजवुद बन्यो होला तर, विचरा कांग्रेस झनझन दुर्वल बन्यो । उठ्नै गाह्रो हुने गरी लथालिंग हालतमा, दुःख पाएका निष्ठावान कार्यकर्ता आम रुपमा उपेक्षित र कुठित !’

पौडेलले पार्टी सभापतिमाथि कम्युनिष्टलाई सत्ता सुम्पिएको र कामचलाउ सरकार भएपछि जनतालाई दिएको राहतसमेत जसभन्दा अपजसको भारी बनेको बताएका छन् ।

उनको प्रश्न छ, ‘समयमै किन नगरेको ?’ देउवाको नेतृत्वमा न पार्टी भल्यो न सरकार भन्दै पौडेलले विधान अनुसार प्रदेश अधिवेशन किन नगरेको, धनुषा जिल्ला कमिटीविहीन किन बनाइयो भन्ने प्रश्न पनि पार्टी सभापतिमाथि उठाएका छन् ।

पौडेलले आम चुनावमा कांग्रेस हार्नुको मुख्य कारण कांग्रेस अत्यन्तै कमजोर हुनु भएको बताएका छन् । कम्युनिष्ट गठबन्धन सहायक कारण मात्र भएको भन्दै उनले भनेका छन्, ‘संघीयताको प्रारम्भीक अभ्यासमै कांग्रेस केन्द्रबाट मात्र बाहिरिएको होइन, सात मध्ये एउटै प्रदेशमा पनि सत्ता सञ्चालनको जिम्मेवारी पाएन । यसले पुष्टि गर्छ, कांग्रेस हरेक कोणबाट हरेक क्षेत्रमा दयनीय अवस्थामा पुगेको छ ।’

कांग्रेस केन्द्र र प्रदेशमा प्रतिपक्षी भए पनि सरकारका गलत निर्णय सच्याउन दबाव दिने बल कांग्रेससँग नरहेको भन्दै उनले भनेका छन्, ‘त्यस्तो अवस्थामा प्रतिपष निरीह भएर बस्नुपर्ने हुनसम्क्छ हुन्छ ।’