नेपालगञ्ज । भारत सरकारको आर्थिक सहयोगमा बाँकेको खजुरा गाउँपालिका–४ स्थित श्री जनकल्याण माध्यमिक विद्यालयको भवन निर्माणका लागि शिलान्यास भएको छ ।

शुक्रबार खजुरा– ४ मा काठमाडौंस्थित भारतीय राजदूतावासका काउन्सलर गीताञ्जलि ब्रैंडन र खजुरा गाउँपालिकाका अध्यक्ष डम्बरबहादुर बि.क.ले संयुक्त रूपमा शिलान्यास गरेका हुन् ।

भारत सरकारको आर्थिक सहयोग करीब नेरु ३.२ करोड लागतमा विद्यालय भवनको निर्माण हुनेछ । यो उच्च प्रभाव सामुदायिक विकास परियोजना बाँकेको खजुरा गाउँपालिकामार्फत कार्यान्वयन हुनेछ ।

बाँके जिल्लामा सञ्चालन भइरहेको ८औँ उच्च प्रभाव सामुदायिक विकास परियोजना रहेको भारतीय राजदूतावासद्वारा जारी प्रेस विज्ञप्तिमा उल्लेख छ ।

खजुरा गाउँपालिकाका अध्यक्ष तथा अन्य सरोकारवालाहरूले भारत सरकारद्वारा प्रदान गरिँदै आएको विकास सहयोगको प्रशंसा गरेका छन् । उनीहरूले नयाँ पूर्वाधारले खजुरा गाउँपालिकाका विद्यार्थी र शिक्षकहरूका लागि सिकाइको वातावरण बढाउन मद्दत गर्ने विश्वास व्यक्त गरेका छन् ।

नजिकको छिमेकी भएको नाताले भारत र नेपालबीच व्यापक र बहुक्षेत्रीय सहकार्य रहेको भारतीय राजदूतावासले जनाएको छ । उच्च प्रभाव सामुदायिक विकास परियोजनाको कार्यान्वयनले प्राथमिकताका क्षेत्रहरुमा पूर्वाधार विकास गर्नुका साथै विकास र समृद्धिलाई अगाडि बढाउने नेपाल सरकारको प्रयासलाई सुदृढ पार्न भारत सरकारको निरन्तर सहयोगलाई प्रतिबिम्बित गरेको विज्ञप्तिमा उल्लेख छ ।