लहान । सुनसरीको कप्तानगञ्जमा २४ वर्षीय ओमप्रकाश मेहताको गोली लागेर मृत्यु भएको घटनाको विरोधमा प्रदर्शनहरू हुन थालेपछि स्थानीय प्रशासनले सिरहामा कर्फ्यु आदेश जारी भएको छ ।

जिल्ला प्रशासन कार्यालय, सिरहाले बिहीबार दिउँसो २ बजेदेखि लागू हुने गरी अर्को आदेश नभएसम्म कर्फ्यु लगाएको छ । पूर्व पश्चिम राजमार्गको पूर्वतर्फ गोलबजार नगरपालिका वडा नं. ३ को कसहा खोलादेखि पश्चिमतर्फ गोलबजार नगरपालिकाको चोहर्वा चोक, उत्तरतर्फको गोलबजार वडा नं. ६ को सैनिक चोकदेखि दक्षिणतर्फ, गोलबजार वडा नं. ४ को रा.प्र.रा.प्र.बहुमुखी क्याम्पस वरीपरीको क्षेत्रमा अर्को आदेश नभएसम्मका लागि कर्फ्यु आदेश जारी भएको सूचनामा उल्लेख छ ।

आन्दोलन वा हुल दंगा बढ्न सक्ने जोखिम देखिएकाले कर्फ्यु जारी गरिएको प्रमुख जिल्ला अधिकारी सुरेन्द्र पौडेलद्वारा जारी आदेशमा उल्लेख छ । गोलबजार नगरपालिकाका विभिन्न स्थानमा कर्फ्यु आदेश जारी गरिएको छ ।

सुनसरीको कप्तानगञ्जमा भएको हिंसात्मक घटनापछि मधेश प्रदेशका विभिन्न जिल्लाहरूमा प्रदर्शन फैलिएको छ ।