काठमाडौं । सभामुख डोलप्रसाद अर्यालले प्रधानमन्त्री बालेन्द्र शाह (बालेन)सहित विभिन्न राजनीतिक दलका नेताहरूसँग अलग अलग भेट गरेका छन् ।

बुधबार सभामुख अर्यालले प्रधानमन्त्री शाहसँग भेट गरेका हुन् । मंगलबार अर्यालले एमाले संसदीय दलका नेता रामबहादुर थापासँग पनि भेट गरेका छन् । अर्यालले नेपाली कांग्रेस संसदीय दलका नेता भीष्मराज आङदेम्बे तथा नेपाली कम्युनिष्ट पार्टीका नेता वर्षमान पुनसँग भेट गरेका छन् ।

भेटमा प्रतिनिधि सभाको बैठकलाई थप प्रभावकारी, मर्यादित र परिणाममुखी बनाउने विषयमा छलफल भएको अर्यालको निजी सचिवालयले जनाएको छ ।

मंगलबार सभामुख अर्यालले विभिन्न दलका प्रमुख सचेतक तथा सचेतकहरूसँग पनि छलफल गरेका छन् । छलफलमा प्रतिनिधि सभाको कार्य सञ्चालनलाई थप प्रभावकारी बनाउने तथा आगामी बैठकका कार्यसूचीलाई व्यवस्थित ढङ्गले अघि बढाउने विषयमा विचार आदानप्रदान भएको छ ।

अर्यालले सुनसरीको देवानगञ्ज–३, कप्तानगञ्जमा भएको घटनाका विषयमा संसददमा उपस्थित भई धारणा राख्न प्रधानमन्त्री शाहलाई आग्रह गरेका छन् ।

बुधबार प्रधानमन्त्रीसँग भएको भेटवार्तामा सभामुख अर्यालले समसामयिक विषयमा सरकारको आधिकारिक धारणा संसदमार्फत सार्वजनिक हुँदा सकारात्मक सन्देश जाने विश्वास व्यक्त गरेका हुन् ।

भेटपछि सञ्चारकर्मीसँग कुरा गर्दै सभामुख अर्यालले प्रधानमन्त्री शाहलाई प्रतिनिधि सभामा सम्बोधन गर्न सुझाव दिएको र प्रधानमन्त्रीले त्यसबारे विचार गर्ने जवाफ दिएको जानकारी दिएका छन् ।

आइतबार राति सुनसरीको कप्तानगञ्जमा भएको घटनामा २४ वर्षीय ओमप्रकाश मेहताको मृत्यु भएपछि सुनसरीसहित मधेस प्रदेशका जिल्लाहरूको अवस्था तनावपूर्ण बनेको छ ।