काठमाडौं । गैरआवासीय नेपाली संघ एनआरएनएले सल्लाहकार नियुक्त गरेको छ ।

सर्वोच्च अदालतको परामादेशबाट गठित उच्चस्तरीय समितिले गरेको महाधिवेशनबाट निर्वाचित महेशकुमार श्रेष्ठ नेतृत्वको अन्तर्राष्ट्रिय समन्वय परिषद् (आइसीसी)को आइतबार बसेको भर्चुअल बैठकले विधानको धारा १७ को उपधारा ९ अनुसार सल्लाहकारहरू नियुक्ति गरेको हो ।

सोनम लामा, थर्क सेन, जानकी गुरुङ, उमेश पुडासैनी, प्रकाश धमला, नवीन शेरचन, शनिकुमार ओली, चित्र सुवेदी, तिलक के.सी., रोविन्द्र श्रेष्ठ (गोविन्द), बेद खरेल, बन्दना सापकोटा शर्मा, आनन्द विष्ट, विष्णु सुवेदी, नारायण थापा, दुर्गा आचार्य, नारायण आचार्य, नरेन्द्र भाट, नारायण सुवेदी, हिक्मत थापा, विश्व बराल, पूर्ण हमाल, विनोद शाह, कृष्ण गिरी र पुरान गिरी रहेका छन् ।

बैठकले पोलिसी एडभोकेसी कमिटी पहिलो पटक गठन गरेको छ । तीन जनाको कमिटीमा खगेन्द्र जिसी संयोजक रहेका छन् । कञ्चन पोखरेल र सुरेन्द्र श्रेष्ठलाई सह संयोजक तोकिएको छ । यसलाई पछि पूर्णता दिइनेछ । कमिटीले एनआरएनएको नीतिगत कुराहरूमा सहयोग गर्ने छ ।

बैठकले विभिन्न टास्कफोर्सहरूको बारेमा पनि निर्णय गरेको संघका सचिव चिन्तामणि सापकोटाले जानकारी दिए । अनुशासन समितिमा दिल गुरुङ, सुवास जोशी र भुवानीप्रसाद तिमिल्सेना रहेका छन् ।

संघले सेप्टेम्बर २१ तारिखमा युएईमा हुने विधान सम्मेलनको तयारीलाई तिब्रता दिने निर्णय गरेको छ । विधान समिति पनि बैठकले गठन गरेको छ । संघका महासचिव बाबुराम लामाको संयोजकत्वमा विधान समिति गठन गरिएका छ । जसको सहसंयोजकमा गुणराज शर्मा, कृष्ण गिरी र लोकप्रसाद दाहाल रहेका छन् । सदस्य सचिवमा विमल सुवेदी रहेका छन् । सदस्यहरूमा बलराम श्रेष्ठ र मन थापा रहेका छन् । एनसीसीको एकता तथा समन्वय समितिको संयोजकको जिम्मेवारी प्रवक्ता गंगाधर गौतमलाई दिइएको छ ।