काठमाडौं । उच्च अदालत पाटनले न्यायाधीश भुवन गिरीलाई वैवाहिक बलात्कार मुद्दामा सफाइ दिएको छ ।

आइतबार न्यायाधीश लालबहादुर कुँवर र डिल्लीरत्न श्रेष्ठको संयुक्त इजलासले गिरीलाई सफाइ दिएको हो ।

वैवाहितक बलत्कारको मुद्दामा जिल्ला अदालत काठमाडौंले २०८१ जेठमा दोषी ठहर गरेको थियो । काठमाडौं जिल्ला अदालतले गिरीलाई सात वर्ष कैद, तीन लाख जरिवानाको सजाय सुनाएको थियो ।

काठमाडौं जिल्ला अदालतको आदेशविरुद्ध गिरीले उच्च अदालत पाटनमा पुनरावेदन गरेका थिए । जिल्ला सरकारी वकिलको कार्यालय काठमाडौंले पनि सजाय कम भएको भन्दै रिट निवेदन दिएको थियो ।

पुनरावेदन रिटमाथि आइतबार भएको सुनुवाइपछि जिल्लाको आदेश उल्टी गर्दै गिरीलाई सफाइ दिएको छ ।

सम्बन्ध विच्छेदपछि पनि पूर्वश्रीमतीलाई सहमतिविना शारीरिक सम्बन्ध राखेको भन्दै गिरीविरुद्ध मुद्दा दायर भएको थियो ।

जिल्लाले फौजदारी अभियोगमा दोषी ठहर गरेपछि गिरीले न्यायाधीश पदसमेत गुमाइसकेका छन् ।

जिल्ला अदालत काठमाडौं र उच्च अदालत पाटनले न्यायाधीश गिरीलाई धरौटीमा छाड्न आदेश दिएका थिए । त्यसपछि सर्वोच्च अदालतले २०८० चैत २१ गते वैवाहिक बलात्कार मुद्दामा गिरीलाई थुनामा पठाउने आदेश गरेको थियो ।