काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी)ले काठमाडौं र भक्तपुरका विभिन्नस्थानबाट अवैध रूपमा अन्तर्राष्ट्रिय कल बाइपास (भीओआईपी) सञ्चालनमा संलग्न चार जनालाई पक्राउ गरेको छ ।

पक्राउ पर्नेहरूमा गोरखाका प्रोशेस गुरुङ, काठमाडौंकी मुना श्रेष्ठ, कञ्चनपुरका जेनित झुकाल र भक्तपुरका कृष्ण नगरकोटी रहेको आइतबार सीआईबीद्वारा जारी प्रेस विज्ञप्तिमा उल्लेख छ ।

उनीहरूलाई भीओआईपी सञ्चालनका लागि प्रयोग हुने उपकरण र त्यससँग सम्बन्धित सामग्रीसहित पक्राउ गरिएको सीआईबीका प्रवक्ता समेत रहेका एसएसपी अनुपमशम्शेर जबराले जानकारी दिएका छन् ।

प्रारम्भीक अनुसन्धानका क्रममा उनीहरूको संलग्नता बेटिङ एप्स ‘एनपीआर ७७ क्यासिनो डटकम’, ‘आईएमई ८८ डटकम’ र ‘खल्ती १८८ डटकम’मा समेत रहेको खुलेको छ ।

उनीहरूको साथबाट ३७५ थान सिम बक्स (भीओआईपी) डिभाइस, १७ थान ल्यापटप, ६ थान ब्याट्री, ४ थान इन्टरनेट हब, ४ थान यूपीएस, ६२ थान मोबाइल फोन, ७९५ थान एनसेल सिमकार्ड तथा अन्य उपकरण बरामद गरिएको सीआईबीले जनाएको छ ।