काठमाडौं । महोत्तरीको साविक भरतपुर गाविसमा बाल संरक्षण अनुदानको रकम हिनामिना गरेको आरोपमा तत्कालीन गाविस सचिव महेश्वर महतो कोइरीसहित तीन जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।

आर्थिक वर्ष २०६८÷०६९ मा बालबालिकाको पोषण भत्ताबापतको कुल ३ लाख ७ हजार २ सय रुपियाँ हिनामिना गरेको भन्दै आयोगले शुक्रबार विशेष अदालत, काठमाडौंमा मुद्दा दायर गरेको छ ।

आयोगका प्रवक्ता सुरेश न्यौपानेले प्रेस विज्ञप्ति जारी गरेर बालबालिकाका लागि निकासा भएको पोषण भत्ता रकम लक्षित वर्गलाई वितरण नै नगरी सचिव कोइरीसमेतले हिनामिना गरेको बताएका छन् ।

तत्कालीन कार्यालय सहयोगी उमाकान्त महतोले आफ्नो पदीय ओहोदाको दुरुपयोग गर्दै तत्कालीन गाविस सचिव महेश्वर महतो कोइरी र जिल्ला विकास समितिको आन्तरिक लेखापरीक्षण शाखाका तत्कालीन सहायक लेखापाल सुरुज साहसँग प्रत्यक्ष मिलेमतो गरी नक्कली भरपाई तयार पारेका थिए ।

उनीहरूले आफैं र अन्य व्यक्तिहरूलाई औँठाछाप लगाउन लगाई कीर्ते भरपाई खडा गरेर पेस्की फछ्र्यौट गराई सरकारी रकम दुरुपयोग गरेको प्रयोगशाला परीक्षण प्रतिवेदनबाट समेत पुष्टि भएको विज्ञप्तिमा उल्लेख छ ।

आयोगले कोइरी, तत्कालीन कार्यालय सहयोगी तथा हाल गौशाला नगरपालिका–४ का वडा सचिव उमाकान्त महतो र तत्कालीन जिल्ला विकास समितिका सहायक लेखापाल तथा हाल भंगाहा नगरपालिकामा कार्यरत अधिकृत सुरुज साहविरुद्ध जनही ३ लाख ७ हजार २०० रुपियाँ बिगो कायम गरेको छ ।