काठमाडौं । नेपाली कांग्रेसका नेता एवम् प्रतिनिधि सभाका सांसद उदयशम्शेर जबराले राज्य व्यवस्था समितिबाट निजामती सेवा विधेयकमा खेलवाड गरेको भन्दै उच्चस्तरीय संसदीय छानविन समितिको माग गरेका छन् ।

मंगलबार प्रेस नोट जारी गरेर कांग्रेस नेता जबराले भने, ‘राज्यव्यवस्था समितिबाट सर्वसम्मतिले पारित भएको निजामती सेवा विधेयकमा जुन खालको चलखेल गरेर विधेयककै महत्वपूर्ण बुँदामा परिवर्तन गरिएको विषय बाहिरिएको छ, यो सार्वभौम संसद र जनताको अभिमतमाथिको प्रहार हो ।’

‘यसलाई सामान्य घटनाका रुपमा नलियोस,’ जबराले भने, ‘यसको छानविनका लागि उच्चस्तरीय संसदीय छानविन समिति तत्काल गठन गरियोस् र यसमा संलग्नलाई कडा कारवाही गरियोस् ।’

सांसद जबराले भने, ‘नत्र महिनौंसम्म समिति र सदनमा विधेयकमाथि छलफल गर्नुको औचित्य के ?’

राज्य व्यवस्था तथा सुशासन समितिबाट सर्वसम्मत पारित भएको र प्रतिनिधि सभाबाट समेत सर्वसम्मत पारित भएको निजामती विधेयकमा २ वर्षको कुलिङ पिरियडलाई काट्ने गरेर अर्को बुँदा सुटुक्क राखेर पारित गरेपछि खैलाबैला भएका बेला कांग्रेसका सांसद जबराले उच्चस्तरीय संसदीय छानविन समितिको माग गरेका हुन् ।