दमक । नेपाली कांग्रेसका नेता कृष्णप्रसाद सिटौलाले किसान र श्रमिकको प्रगति नभएसम्म मुलुकको विकास सम्भव नहुने बताएका छन् ।

आइतबार झापामा नेपाल किसान महासंघले हल्दीबारीमा आयोजना गरेको धान महोत्सवमा सिटौलाले संविधानले किसानका विषयलाई प्राथमिकता दिएकाले स्थानीय र प्रदेश सरकारले किसानको जीवनस्तर सहज बनाउने किसिमका योजना ल्याउनुपर्ने बताए ।

नेता सिटौलाले आगामी आर्थिक वर्षको बजेटमा किसानका मुद्दालाई सम्बोधन गर्न पहल भइरहेको बताए । राज्यको अनुदान वास्तविक किसानसम्म पु¥याउनुपर्ने उनले बताएका छन् । सिटौलाले कृषिको अनुदान वास्तविक किसानसम्म नपुगेको बताए ।

किसानलाई समयमै बीउ, मल र उत्पादनको उचित मूल्य पाउने सुनिश्चितता राज्यले गराउनुपर्ने नेता सिटौलाले बताए ।

नेपाल किसान महासङ्घका जिल्ला अध्यक्ष रतन सुब्बाले मल अभाव, चैते धानको मूल्य नपाएको लगायत किसानका विद्यमान समस्या समाधानका लागि पहल गरिदिन माग गर्दै नेता सिटौलालाई ज्ञापनपत्र बुझाएका छन् ।