ओलीले धमाका पार्टी प्रवेश गराएको नगरपालिकामा कांग्रेसको शक्तिशाली जित
कृष्णनगर । कपिलवस्तुको कृष्णनगर नगरपालिकाको मेयर र उप–मेयरमा नेपाली कांग्रेसले जित हासिल गरेको छ ।
शुक्रबार निर्वाचन आयोगले सार्वजनिक गरेको अन्तिम नतिजाअनुसार कांग्रेसका ५० वर्षीय रजतप्रताप शाह मेयरमा निर्वाचित भएका हुन् । शाहले ५६०६ मत पाएका छन् ।
शाहसँग राप्रपाका ४३ वर्षीय दीपक रजौरिया ४११२ मतसहित पराजित भएका हुन् । शाह र रजौरियाबीच १४९४ मतको अन्तर रहेको छ ।
उप–मेयरमा पनि कांग्रेसकी ५२ वर्षीया आरतीदेवी चौधरी ५६९१ मतसहित निर्वाचित भएकी छिन् । चौधरीसँग जनता
समाजवादी पार्टी नेपालकी ४३ वर्षीया आरती सिंह यादब ३२८२ मतसहित पराजित भएकी छिन् ।
कृष्णनगर नगरपालिकाको १२ वटा वडामा कांग्रेसले ३ वटा वडाध्यक्ष जितेको छ ।
वडा नं. ४ को वडाध्यक्षमा कांग्रेसका घनश्याम बनिया निर्वाचित भएका छन् । वडा नं. ५ मा कांग्रेसका मोहम्मद जमिल खाँ र १० मा हरिपाल चतुर्वेदी वडाध्यक्षमा विजयी भएका छन् ।
यसैबीच, कांग्रेसका प्रतिनिधि सभाका सांसद एवम् पूर्व केन्द्रीय सदस्य अभिषेकप्रताप शाहले कांग्रेसबाट कृष्णनगर नगरपालिकाको मेयर, उप–मेयर, वडाध्यक्ष र सदस्यहरू बधाई दिएका छन् ।
केही समय पहिला एमालेका अध्यक्ष खड्गप्रसाद ओलीले कृष्णनगर नगरपालिकामा भव्य कार्यक्रम गरेका थिए ।
केही व्यक्ति एमालेमा प्रवेश पनि गरेका थिए । तर, सोही नगरपालिकामा कांग्रेसले शानदार जित हासिल गरेको छ ।
फेसबुकबाट तपाईको प्रतिक्रिया