काठमाडौं । सरकारले स्थानीय तहको निर्वाचनको मिति वैशाख ३० गते घोषणा गरेका बेला गृहमन्त्री बालकृष्ण खाण र अर्थमन्त्री जनार्दन शर्माबीच निर्वाचनका विषयमा छलफल भएको छ ।

बुधबार गृह मन्त्रालयमा खाण र शर्माबीच निर्वाचन लक्षित बजेटका विषयमा छलफल भएको नीति, योजना, अनुगमन तथा मूल्याङ्कन महाशाखा प्रमुख सह–सचिव डा भीष्मकुमार भुसालले जानकारी दिए ।

उनले सुरक्षा निकाय (नेपाल प्रहरी र सशस्त्र प्रहरी) का लागि आवश्यक सवारी साधन र बन्दोबस्तीका सामानबारे कुराकानी भएको बताए ।

गृह मन्त्रालयले बिहीबारसम्म चालुतर्फको समेत बजेट यकिन गरेर अर्थ मन्त्रालयमा पठाउनेछ ।

छलफलमा गृहसचिव टेकनारायण पाण्डे, अर्थसचिव मधु मरासिनीसहित गृह मन्त्रालयका सुरक्षा तथा समन्वय महाशाखा प्रमुख सह–सचिव मुकुन्द निरौलालगायतको सहभागिता थियो ।

गृहमन्त्री खाणलाई अर्थमन्त्री शर्माले निर्वाचनमा अर्थ मन्त्रालयलाई परेको चापबारे जानकारी गराएका छन् ।

नेपाल प्रहरी र सशस्त्र प्रहरीले निर्वाचनमा खटिनका लागि सवारी साधन र बन्दोबस्तीका सामान माग गरेपछि गृहमन्त्री खाणले अर्थमन्त्री शर्मासँग छलफल गरेका हुन् ।