एनआरएनएको अध्यक्षमा आचार्यले हारेर ‘ह्याट्रिक’ गर्ने, कांग्रेसीहरू रिसाएर फायर
काठमाडौं । नेपाली कांग्रेसको अनौपचारिक समर्थन पाएका कुल आचार्यले गैरआवासीय नेपाली संघ (एनआरएनए) अधिवेशनमा अध्यक्ष पदमा उम्मेदवार बनेर ‘ह्याट्रिक’ गर्ने भएका छन् ।
आइतबार काठमाडौंमा आचार्यले तामझामका साथ पत्रकार सम्मेलन गरेर अध्यक्ष पदमा उम्मेदवारी घोषणा गरेका छन् । अघिल्लो अधिवेशनमा पनि अध्यक्ष पदमा उम्मेदवारी घोषणा गरेका आचार्य नराम्रोसँग पराजित भएका थिए । आचार्यलाई एमालेको समर्थनमा अध्यक्ष पदमा उम्मेदवार बनेका कुमार पन्तले पराजित गरेका थिए ।
अघिल्लो अधिवेशनमा टिम मिलाउन नसक्दा आचार्यले पराजय भोग्नु परेको थियो । यस पटक पनि आचार्यले टिम नमिलाएरै अध्यक्ष पदमा उम्मेदवारी घोषणा गरेका छन् । आचार्यलाई आफ्नै टिमभित्रबाट दोस्रो पटक हराएर ‘ह्याट्रिक’ गराउने अभियानमा रहेको बुझिएको छ ।
आचार्यले २०२१–२०२३ कार्यकालका लागि संघको अध्यक्षमा औपचारिक रुपमा उम्मेदवारी घोषणा गरेका हुन् ।
संघको दशौं विश्वसम्मेलन आगामी अक्टोबरको २३–२५ सम्म काठमाडौंमा हुँदैछ । निर्वाचन समितिले अनलाइन माध्यमबाट विश्वभरबाट एकसाथ मतदान गराउने तयारी गरेको छ ।
हाल एनसीसीको संख्या ८४ रहेपनि कतिपय एनसीसीहरू निष्कृय छन् । संघका पञ्जीकृत सदस्यहरूको संख्या एक लाखको हाराहारीमा छ ।
आचार्यलाई संघको अध्यक्ष पदमा कांग्रेसले अनौपचारिक रुपमा समर्थन गरेपछि धेरै प्रतिनिधि रहेको अमेरिका र खाडी मुलुकमा असन्तुष्टि बढेको छ । युरोपका केही देशहरूमा पनि आचार्यले अध्यक्ष पदमा उम्मेदवारी घोषणा गरेपछि कांग्रेस निकटका अधिकांश प्रतिनिधिहरू रिसाएका छन् ।
अमेरिकामा रहेका कांग्रेस निकटका एनआरएनएका प्रतिनिधिहरूले पटक–पटक बेलायतमा बस्दै आएका र अघिल्लो निर्वाचनमा पराजित भएका आचार्यलाई नै अध्यक्ष पदमा सघाएको भनेर आक्रोश बढेको छ ।
गएको अधिवेशनमा आचार्यलाई अमेरिकाका असन्तुष्ट कांग्रेसी प्रतिनिधिहरूले नै हराएका थिए । यस पटक पनि आचार्यका दिनदशा खराब रहेको चर्चा छ ।
फेसबुकबाट तपाईको प्रतिक्रिया