कांग्रेसबाट निर्वाचित वडाध्यक्षहरूको सुझावले पोखरामा खैलाबैला
पोखरा । नेपाली कांग्रेसबाट पोखरा महानगरपालिकाका ११ वटा वडामा निर्वाचित वडा अध्यक्षहरूले महानगरपालिकालाई विभिन्न पाँच बुँदे सुझाव दिएका छन् ।
पोखरा महानगरपालिकाले बजेट अधिवेशनमार्फत् आर्थिक वर्ष २०७८–७९ को बजेट विनियोजनको तयारी गरिरहेका बेला कांग्रेसबाट निर्वाचित वडा नं. २, ३, ४, ६, ९, १०, ११, १२, २३, २७ र ३२ का वडाध्यक्षहरूले सुझाव दिएका हुन् ।
वडाध्यक्षहरूको तर्फबाट दलको नेता तथा सचेतक रामराज लामिछानेले सोमबार विज्ञप्ति प्रकाशित गरी कोरोनाबाट प्रत्यक्ष प्रभावित पर्यटन, उद्योग, व्यापार, यातायात क्षेत्रलाई ५० प्रतिशत कर छुट दिन माग गरेका छन् ।
उनीहरूले स्वास्थ्य क्षेत्रलाई प्राथमिकतामा राखेर खोपको व्यवस्था मिलाउन, निष्पक्ष रुपमा बजेट विनियोजन गर्न सुझाव दिएका छन् ।
लामो समयदेखि स्थानीय तहमा कार्यरत स्थायी, अस्थायी, करार, ज्यालादारी कर्मचारीहरूको मनोवल उच्चो हुने गरी वृत्ति विकासका कार्यक्रम ल्याउन र निजामती सरह नै सेवा सुविधा प्रदान गरी एक तह बढुवा गर्न वडाध्यक्षहरूले सुझाव दिएका छन् ।
स्वास्थ्य महाशाखाका कर्मचारीले कोरोनाको खोप दुरुपयोग गरेको भन्ने सुनिएकाले सत्य तथ्य छानविन गरी दोषीलाई कारवाही गर्न सुझाव दिइएको छ ।
गण्डकी प्रदेश सरकारलाई पनि तीन बुँदे सुझाव दिइएको छ । विज्ञप्तिमा नागरिकको जीवन रक्षालाई पहिलो प्राथमिकतामा राखि बजेट विनियोजन तथा खोपको व्यवस्था गर्न, कोरोना प्रभावित क्षेत्रमा सम्वद्व सबै क्षेत्रका उद्योगी व्यवसायीलाई सम्वोधन हुने गरी करको दायरा बढाएर दर कम गर्न, पोखराको पृथ्वीचोक बसपार्क यसअघिको प्रदेश सरकार र पोखरा महानगरपालिकाले बनाउन कुनै पहल नगरेको हुँदा आवश्यक पहल गर्न प्रदेश सरकारलाई सुझाव दिइएको छ ।
विज्ञप्तिमा मुख्यमन्त्री कृष्णचन्द्र नेपाली पोखरेल नेतृत्वको गण्डकी प्रदेश सरकारलाई बधाई तथा शुभकामना व्यक्त गर्दै विपद् प्रतिकार्य योजना बनाउने र महिलाको स्तन, पाठेघरको मुख र पाठेघरको क्यान्सर उपचार निःशुल्क बनाउने प्रदेश सरकारको निर्णय प्रशंसनीय भएको भन्दै स्वागत गरिएको छ ।
फेसबुकबाट तपाईको प्रतिक्रिया