काठमाडौं । नेपाली कांग्रेसका सह–महामन्त्री एवम् कोभिड–१९ अनुगमन समितिका संयोजक डा.प्रकाशशरण महतले भेरी अस्पतालमा भएको घटनाको विरोध गर्दै दोषीलाई कारबाहीको माग गरेका छन् ।

डा.महतले शुक्रबार विज्ञप्ति जारी गरेर अस्पतालका चिकित्सक र नर्सहरूलाई आक्रमण गर्ने कार्य निन्दनीय रहेको बताए ।

उनले जेठ १३ गते भेरी अञ्चल अस्पतालमा कोरोना संक्रमितको उपचारको क्रममा मृत्यु भएको घटनालाई लिएर मृतकका आफन्तहरूले डाक्टर र नर्सहरूमाथि आक्रमण गर्न खोज्दा ज्यान जोगाउन अस्पताल भवनबाट हामफालेको घटना सम्बन्धी समाचारप्रति गम्भीर ध्यान गएको बताएका छन् ।

‘स्वास्थ्यकर्मीहरूमा डर र त्रास उत्पन्न भएका कारण अस्पतालको काम समेत प्रभावित भई विरामीहरुको उपचारमा समेत गम्भीर असर परेको घटनालाई हामीले गम्भीरताका साथ लिएका छौं’, उनले भनेका छन् ।

‘नेपाली कांग्रेस कोभिड—१९ अनुगमन समिति स्वास्थ्यकर्मी माथि भएको यस्तो आक्रमणको निन्दा गर्दछ’, डा.महतले भने, ‘सरकारसँग स्वास्थ्यकर्मीहरूको सुरक्षा र यस्ता आक्रमकजन्य क्रियाकलापहरूलाई रोक्न कानूनी कारवाहीलाई सख्त गर्न पनि माग गर्दछ ।’

एमालेका लुम्बिनी प्रदेश कमिटीका सदस्य मानबहादुर रावतको नेतृत्वमा भेरी अस्पतालका डाक्टर र नर्सहरूलाई कुटपिट गर्नुका साथै अस्पतालमा तोडफोड गरेका थिए ।