ओली र एमालेको पुच्छर बनेपछि दुई टुक्रा भयो पार्टी !

काठमाडौं । जनता समाजवादी पार्टी नेपाल (जसपा)मा राजेन्द्र महतो संसदीय दलको नेता चयन भएपछि पार्टी फुटको निश्चित भएको छ ।

भक्तपुरको डोलेश्वर रिसोर्टको भेलाबाट महतोले संसदीय दलको नेता भएको दाबीसहित समाचार बाहिर ल्याएपछि जसपामा भाँडभैलो मच्चिएको छ । पूर्वसहमतिअनुसार महतोलाई नै संसदीय दलको नेता बनाउने तयारी भएको थियो ।

जसपाका अध्यक्ष महन्थ ठाकुरकै कारण दलको नेता चयनमा ढिलाइ भएको थियो । दलको नेताका लागि ठाकुरले पनि रुचि देखाएका थिए ।

तत्कालीन राजपा र संघीय समाजवादी पार्टीबीच एकीकरणपछि बनेको जसपा समायोजन हुँन बाँकी छ । सहमतिमा जसपा समायोजन हुनुपर्छ ।

एमाले नेतृत्वको सरकारलाई समर्थन गर्ने वा नगर्ने भन्ने विषयमा विवाद भएपछि जसपा फुटको संघारमा पुगेको छ । उपेन्द्र यादव र बाबुराम भट्टराई कांग्रेससँग मिलेर सरकार बनाउने पक्षमा छन् ।

महन्त ठाकुर र राजेन्द्र महतो एमालेको नेतृत्वको सरकारसँग मिलेर जान चाहेका छन् । यही विषयमा जसपाभित्र फुट भएको छ ।

महन्त ठाकुर र राजेन्द्र महताले एमालेका नेता महेश बस्नेतमार्फत आफू निकटका सांसदहरूलाई रिसोर्टमा राखेपछि उपेन्द्र यादव रिसाएर फायर भएका छन् ।

उपेन्द्र यादवले राजेन्द्र महतो संसदीय दलको नेता बनेको विषय आफूलाई थाहा नभएको प्रतिक्रिया दिएका छन् । उनले भने, ‘जसपाको संसदीय दलको नेता बनेको मलाई थाहा छैन । महेश बस्नेतहरूले बनाए होलान् ।’

उपन्द्र यादवको यो प्रतिक्रियाले जसपा एक छ भन्ने कुरालाई खण्डन गरिदिएको छ । जसपा औपचारिक रुपमा विभाजन नभए पनि अनौपचारिक रुपमा दुई टुक्रा भइसकेको छ ।

जसपाका सांसदहरूलाई रिसोर्टमा राखे एमालेका नेता महेश बस्नेतले दलको नेता चयन गर्नेदेखि विभिन्न खालका निर्णयहरू गराएपछि मधेशको नाममा राजनीति गर्दै आएका महन्त ठाकुर र राजेन्द्र महतो कसको इसालामा चल्छन् भन्ने कुरा प्रष्ट भएको छ ।

Published : Saturday, 2021 May 15, 11:43 am

फेसबुकबाट तपाईको प्रतिक्रिया