काठमाडौं आइपुग्यो ३२ हजार भाइल रेम्डिसिभर, सरकारी अस्पतालमा निःशुल्क पाइने
काठमाडौं । कोरोनाभाइरसका गम्भीर संक्रमितलाई प्रयोग गर्दा उपयोगी मानिएको ३२ हजार भाइल रेम्डिसिभर काठमाडौं आइपुगेको छ ।
बंगलादेशबाट मंगलबार राति करीव ७ बजे रेम्डिसिभर त्रिभुवन अन्तर्राष्ट्रिय विमानस्थलमा उत्रिएको औषधि आयातकर्ता पवन आचार्यले बताएका छन् ।
हिमालय एयरलाइन्सको विमानले रेम्डिसिभर औषधि ल्याएको हो ।
३२ हजार भाइलमध्ये सरकारले १० हजार र निजी सप्लार्यसले २२ हजार भाइल ल्याउन ल्याएका छन् ।
रेम्डिसिभर औषधि सरकारी अस्पतालमा वितरण गरिनेछ । सरकारी अस्पतालहरूमा रेम्डिसिभर औषधि निःशुल्क वितरण गरिनेछ ।
सप्लार्यसले ल्याएको रेम्डिसिभर औषधिको मूल्य करीव ५ हजार तोकिएको स्वास्थ्य मन्त्रालयका प्रवक्ता डा.जागेश्वर गौतमले जानकारी दिएका छन् ।
निजी क्षेत्रको आयान हेल्थ केयर प्रालि कुपण्डोलले २२ हजार भाइल रेम्डिसिभर औषधि ल्याएको छ । आयानले दुई वटा कम्पनी इन्सेफ्टा र वेकनले बंगलादेशबाट सो औषधि ल्याएको छ ।
रेम्डिसिभर औषधि नेपाली बजारमा नपाइएपछि कालोबजारी गर्नेहरूले २० हजारदेखि १ लाखसम्म रुपियाँ लिएर विक्री गरेको गुनासाहरू आएका थिए ।
सरकारले कालोबजार नहोस् भनेर आफै रेम्डिसिभर ल्याएको छ । निजी क्षेत्रलाई पनि रेम्डिसिभर आयात गर्न अनुमति दिएको छ ।
रेम्डिसिभर लिनका लागि कोरोनाका संक्रमित भर्ना भएको सम्बन्धित अस्पतालको सिफारिस चाहिनेछ ।
फेसबुकबाट तपाईको प्रतिक्रिया