रथी खड्काले पाए बलाध्यक्षको जिम्मेवारी, सेनाका तीन जनाको उच्च तहमा बढुवा

काठमाडौं । नेपाली सेनाका प्रधानसेनापति प्रभुराम शर्माले रथी दर्जामा पदोन्नति भएका सीताराम खड्कालाई दर्ज्यानी चिन्ह प्रदान गरेका छन् ।

शुक्रबार सैनिक मुख्यालय भद्रकाली, काठमाडौंमा आयोजित विशेष समारोहमा प्रधानसेनापति शर्माले रथी खड्कालाई दर्ज्यानी प्रदान गरेको विज्ञप्तिमा उल्लेख छ ।

मन्त्रिपरिषदले कात्तिक १६ गते उपरथी खड्कालाई रथी पदमा बढुवा गरेको थियो । पदोन्नति भएका रथी खड्का बलाध्यक्षमा नियुक्ति भएका छन् ।

उपरथी दर्जामा बढुवा भएका सहायक रथी विजय थापा र सहायक रथी आशबहादुर तामाङ्ग (पीएच.डी.)लाई प्रधान सेनापति शर्माले उपरथी दर्जाको दर्ज्यानी चिन्ह समेत प्रदान गरेका छन् ।

पदोन्नति भएका उपरथी विजय थापा सुदूरपश्चिम पृतना हेडक्वाटरका पृतनापति र उपरथी आशबहादुर तामाङ्ग नेपाली सैनिक वार कलेजका शिक्षाध्यक्षमा नियुक्ति भएको छ ।