काठमाडौं । नेपाल प्रहरीका एआईजी सहकुलबहादुर थापाको सरुवा भएको छ ।

सरकारले एआईजी थापाको सरुवासँगै कार्यविभागमा कार्यरत डीआईजी वसन्त कुँवरलाई चुनावी कमाण्डको जिम्मेवारी दिइएको छ ।

सोमबार बसेको मन्त्रिपरिषद् बैठकले एआईजी थापालाई सरुवा गरेको हो ।

थापा नेपाल प्रहरीका निर्वाचन सेलका संयोजक थिए । थापाले यसअघि स्थानीय तहको निर्वाचनमा चुनावी कमाण्डरको काम गरेका थिए ।

एआईजी थापालाई सरुवा गरेर राष्ट्रिय प्रहरी प्रशिक्षण प्रतिष्ठानमा पठाइएको छ ।

प्रतिनिधि सभा र प्रदेश सभा निर्वाचनका लागि यसअघि नै उनी नेतृत्वको केन्द्रीय निर्वाचन सेल गठन गरिएको थियो ।
सेलले काम थालिनसक्दै प्रमुख थापाको सरुवा भएको छ ।

यसअघि राष्ट्रिय प्रहरी प्रशिक्षण प्रतिष्ठानमा कार्यरत एआईजी मुकुन्दराज आचार्यले भदौ २३ देखि अवकाश पाएपछि निर्देशक पद रिक्त थियो । सोही रिक्त स्थानमा एआईजी थापालाई पठाइएको छ ।

एआईजी थापालाई एमाले समर्थकको आरोप लाग्दै आएको छ । तत्कालीन झण्डै दुईतिहाईको कम्युनिस्ट सरकारले थापालाई बढुवा गरेको थियो । तत्कालीन प्रधानमन्त्री खड्गप्रसाद ओलीले एआईजी थापालाई निकै मन पराउँछन् ।