काठमाडौं । स्वास्थ्य तथा जनसंख्या मन्त्रालयले कोरोनाभाइरसका संक्रमितहरूको उपचारका लागि अस्पतालहरूमा बेड अभाव भएको जनाएको छ ।

मन्त्रालयमा शुक्रबार आयोजित नियमित पत्रकार सम्मेलनमा प्रवक्ता डा.जागेश्वर गौतमले कोरोनाका संक्रमितहरूलाई उपचार गराउन बेडको अभाव भएको बताए ।

उनले निजी अस्पतालहरूलाई वीस प्रतिशत बेड कोरोना संक्रमितको उपचारका लागि राख्न आग्रह गरेका छन् ।

झण्डै दुईतिहाइको खड्गप्रसाद ओली नेतृत्वको कम्युनिस्ट सरकारले कोरोनाभाइरसको संक्रमण रोकथाम र नियन्त्रणमा काम गर्न नसकेको भनेर आलोचना भइरहेका बेला स्वास्थ्य मन्त्रालयका प्रवक्ता डा.गौतमले बेड अभाव भएको बताएका हुन् ।

उनले कोरोनाभाइरसको संक्रमणबाट आफै बच्नुपर्ने पनि बताएका छन् । ‘कोरोनाको औषधि पत्ता लागेको छैन’, उनले भने, ‘मास्क लगाउने, सामाजिक दुरी कायम गर्ने, साबुन पानीले हात धुने, बेलाबेला सेनिटाइजर लगाउने कार्य गरेर कोरोनाको संक्रमणबाट आफै बच्नुपर्छ ।’