काठमाडौं । नेपाली कांग्रेसका नेताहरूले गणेशमान सिंहको २२औँ स्मृति दिवसको अवसर पारेर डेंगी रोगबाट संक्रमितहरूलाई सहयोग गर्ने उदेश्यले काठमाडौंमा रक्तदान गरेका छन् ।

वीपी स्मृति सामुदायिक सहकारी अस्पताल र यशोदादेवी–भगवानसिंह केसी मेमोरियल ट्रस्टको संयुक्त आयोजनामा बिहीबार काठमाडौंमा रक्तदान कार्यक्रम गरिएको हो ।

कार्यक्रममा नेपाली कांग्रेसका नेता तथा कार्यकर्ताहरूले रक्तदान गरेको नेपाली कांग्रेस नुवाकोटका सभापति जगदीश्वर नरसिंह केसीले जानकारी दिए ।

कार्यक्रममा नेपाली कांग्रेसका केन्द्रीय सदस्य अर्जुन नरसिंह केसी, नुवाकोट कांग्रेसका सभापति जगदीश्वर नरसिंह केसी, डा.केदार नरसिंह केसी लगायतको उपस्थिति रहेको थियो ।

कार्यक्रममा काठमाडौंसहित विभिन्न जिल्लामा डेंगी रोगको संक्रमणबाट बच्न घरको वरपर सरसफाइमा ध्यान दिनुपर्ने जानकारी दिइएको थियो ।

डेंगी रोगका लामखुट्टे सफापानीमा उत्पती हुने भएकाले जमेका पानी फाल्न सुझाव दिइएको थियो ।