हेटौँडा । बुद्धिचाल प्रतियोगिताको उपाधि ललितपुर जिल्ला टिमले जित्न सफल भएको छ ।

प्रदेश खेलकुद विकास परिषद्, बागमती प्रदेशद्वारा आयोजित तीन दिन सञ्चालन भएको प्रतियोगितामा क्लासिकल, र्‍यापिड तथा ब्लिट्ज् बुद्धिचाल खेल पुरुष तथा महिला तीन विधामा ६ स्वर्ण, ६ रजत र ६ काश्य पदकमध्ये ललितपुरले २ स्वर्ण २ रजत पदक जित्दै टिम च्याम्पियन बनेका छन् ।

ललितपुरले पुरुष क्लासिकल र र्‍यापिड विधामा १–१ स्वर्ण, ब्लिट्ज् १ रजत र महिला र्‍यापिड १ रजत प्राप्त गरी २ स्वर्ण २ रजत पदकसहित टिम च्याम्पियन बनेका छन् ।

चितवन जिल्ला टिम उपविजेता बनेको छ । महिलातर्फ क्लासिकल र र्‍यापिड विधातर्फ १–१ स्वर्ण पदक जित्न सफल भएका छन् ।

काठमाडौं जिल्लाले प्रतिस्पर्धामा तृतीय स्थान हासिल गरेको छ । काठमाडौं जिल्लाले महिला ब्लिट्ज १ स्वर्ण, १ रजत र १ काश्य पदक प्राप्त गरेको छ ।

स्पर्धामा काभ्रे जिल्लाले चौथो स्थान हासिल गर्दै पुरुषतर्फको ब्लिट्ज् १ स्वर्ण, क्लासिकल १ रजत पदक प्राप्त गरेको छ । मकवानपुर जिल्लाले पुरुष र्‍यापिडतर्फ १ रजत र धादिङ जिल्लाले महिला ब्लिट्ज् १ रजत पदक जितेका छन् ।

भक्तपुर जिल्लाले पुरुषतर्फ र्‍यापिड १, ब्लिट्ज् १ र महिलातर्फ ब्लिट्ज् १ पदक प्राप्त गरेको छ । दोलखा जिल्लाले क्लासिकल पुरुषतर्फ १ काश्य पदक र रामेछाप जिल्लाले महिलातर्फ १ काश्य पदक हासिल गर्न सफल बनेका छन् ।

बागमती प्रदेश खेलकुद विकास परिषद् बुद्धिचाल खेल संयोजक संगीत श्रेष्ठको सभापतित्वमा आइतबार पुरस्कार वितरण तथा समापन समारोह हेटौँडा पार्टी पालेसको सभाहलमा सम्पन्न भएको छ ।