काठमाडौं । क्षेत्रपाटी क्लबका संस्थापक अध्यक्ष स्व.रामहरि कृष्ण मानान्धरको सम्झनामा वैशाख १६ देखि १८ गतेसम्म तेस्रो रापिड तथा दोश्रो ब्लिट्ज राष्ट्रिय चेस च्याम्पियनसिपको तयारी पूरा भएको छ ।

काठमाडौंमा सोमबार पत्रकार सम्मेलन गरेर क्षेत्रपाटी क्लबका अध्यक्ष गोपाल मालीले क्लबको वार्षिक उत्सवको अवसरमा तीन दिन सञ्चालन हुने प्रतिस्पर्धाका विजेता खेलाडीहरूलाई नगद रु. ३ लाख पुरस्कार प्रदान गरिने बताए ।

प्रतियोगिताका संयोजक मालीले तेस्रो रापिडका विजेता खेलाडीलाई नगद रु. २ लाख पुरस्कार प्रदान गर्ने घोषणा गरेका छन् ।

जसमा पुरुष खुल्लातर्फ प्रथम हुनेले रु. ३५ हजार, द्वितीयले रु. २५ हजार तथा तृतीयले १५ हजार र महिलातर्फ प्रथम हुनेले १० हजार, द्वितीयले ७ हजार तथा तृतीयले ५ हजार पुरस्कार प्राप्त गर्ने छन् । विभिन्न विधा गरि २७ जना खेलाडीहरूलाई पुरस्कार दिइनेछ ।

दाश्रो राष्ट्रिय ब्लिट्ज स्पर्धामा नगद रु. १ लाख पुरस्कारमध्ये प्रथम हुनेलाई रु. १५ हजार, द्वितीयलाई रु. १० हजार, तृतीयलाई रु. ८ हजार तथा महिलातर्फ क्रमशः नगद रु. ५ हजार, रु. ३ हजार र रु. २ हजार एवं विधागत गरी १७ जना खेलाडीलाई पुरस्कार दिइनेछ ।

बौद्घिक बुद्घिचाल खेलको प्रमुख आकर्षकका रुपमा विजयी टप १० खेलाडी, विधागत अन्तर्गत ५५ वर्षमाथि भेट्रान उत्कृष्ट दुई जनालाई, युवा जुनियर १२, १४, १६ वर्षमुनि जम्मा ९ जनालाई, नयाँ उत्कृष्ट खेलाडी तीन जनालाई, रेटेड १६ सयमुनि तीनलाई , १८ सयमुनि तीनलाई नगद पुरस्कार सहित मेडल, प्रमाण पत्र हस्तान्तरण गरिने मालीले जानकारी गराएका छन् ।

नेपाल बुद्घिचाल महासंघका अध्यक्ष हेराकाजी महर्जनले राष्ट्रिय रापिड तथा ब्लिट्ज बुद्घिचाल प्रतिस्पर्धामा २०० जना शीर्ष खेलाडीहरूको सहभागीता रहने जानकारी गराएका छन् ।

नेपाल बुद्घिचाल महासंघले प्रत्येक वर्ष ओपन नेशनल, ओमन नेशनल, नेशनल एमेच्योर, नेशनल भेट्रान, नेशनल टिम, स्कूल टिम, नेशनल युथ, नेशनल क्याडेड लगायतका राष्ट्रिय प्रतियागिताहरू आयोजना गर्दै आएको महर्जनले जानकारी गराए ।

प्रमुख निर्णायक फिडे आर्विटर सोराज ताम्राकारले स्वीस लिग प्रणाली अन्तर्गत रापिडतर्फ ९ चरण तथा ब्लिट्जतर्फ ११ चरणका खेल सञ्चालन गर्नेछन् ।

महासंघले दुबै राष्ट्रिय प्रतियोगिताका ५ खेलहरू डीजीटी बोर्डमार्फत प्रत्यक्ष प्रसारण गर्ने भएका छन् ।

विश्व बुद्घिचाल महासंघ, एशियन चेस फेडेरेशनको तत्तवावधान एवं काठमाडौं बुद्घिचाल संघको सहकार्य तथा क्षेत्रपाटी क्लबको स्थानीय व्यवस्थापनमा प्रतियोगिता आयोजना हुने भएको छ ।

महासंघका प्रवक्त राजु ताम्राकार, सदस्य रमिला पोखरेल, काठमाडौं बुद्घिचाल संघका अध्यक्ष केशब श्रेष्ठ, क्षेत्रपाटी क्लबका उपाध्यक्ष महफुज उद्दिन, सचिव राजु माली, कोषाध्यक्ष दिनेश श्रेष्ठ, सदस्य सुरेश श्रेष्ठ, निर्मा महर्जन, नरेन्द्रमान बज्राचार्य लगायतको उपस्थिति रहेको थियो ।