कांग्रेसद्वारा भ्रातृ र शुभेच्छुक संस्थाहरूसँग छलफल, तरुणहरू सबै क्षेत्रमा खटिने

काठमाडौं । नेपाली कांग्रेसले प्रतिनिधि सभा सदस्य निर्वाचनको तयारीका विषयमा आफ्ना भ्रातृ तथा शुभेच्छुक संस्थाहरूसँग छलफल गरेको छ ।

बिहीबार पार्टी कार्यालय, सानेपामा कांग्रेसका नेताहरूले निर्वाचनको तयारी, रणनीति र प्रचार प्रसारका विषयमा छलफल गरेको हो । नेपाल तरुण दलका अध्यक्ष विद्वान गुरुङले निर्वाचनमा तरुणहरूलाई परिचालन गर्न पहल गर्ने बताए । उनले कांग्रेसका उम्मेदवारहरूलाई विजयी बनाउन सबै निर्वाचन क्षेत्रमा तरुणहरू परिचालन हुने बताए ।

तरुण अध्यक्ष गुरुङले कांग्रेसका आधिकारिक उम्मेदवारहरूलाई विजयी बनाउन आग्रह गरेका छन् । उनले तरुणहरूलाई चुनावमा खटाउन समन्वय गर्ने बताएका छन् ।

छलफलमा नेपाल तरुण दल, नेपाल महिला संघ, नेपाल विद्यार्थी संघ लगायतका भ्रातृ तथा शुभेच्छुक संस्थाका प्रमुख र प्रतिनिधिहरूको सहभागिता रहेको थियो ।

Published : Thursday, 2026 January 29, 9:11 pm