काठमाडौं । अखिल नेपाल फुटबल संघ (एन्फा)ले अनुशासनहीन कार्य गर्ने आफ्ना वरिष्ठ उपाध्यक्ष वीरबहादुर खड्कालाई निलम्बनसहितको कारबाही गरेको छ ।

शुक्रबार भर्चुअल रुपमा बसेको एन्फाको आपतकालीन बैठकले खड्कालाई निलम्बन गरेको हो । एन्फा अध्यक्ष पंकजबिक्रम नेम्बाङले खड्कालाई गत आइतबार स्पष्टीकरण सोधेका थिए ।

अध्यक्ष नेम्बाङ विदेश गएको बेला आफू स्वतः कार्यवहाक अध्यक्ष भएको भन्दै खड्काले महासचिव किरण राईलाई स्पष्टीकरण सोधेका थिए । तीन दिनभित्र जावाफ नदिएको भन्दै खड्काले महासचिव राईलाई निलम्बन समेत गरेका थिए ।

महासचिव राईलाई निलम्बन गरेको प्रक्रिया अनाधिकृत भएको भन्दै अध्यक्ष नेम्बाङले वरिष्ठ उपाध्यक्ष खड्कालाई आइतबार स्पष्टीकरण सोधेका थिए । खड्कालाई पाँच वटा प्रश्न गर्दै स्पष्टीकरण सोधिएको थियो । जवाफ चित्तबुझ्दो नभएपछि खड्का निलम्बनमा परेका हुन् । खड्काको निलम्बन आगामी साधारण सभासम्म हुनेछ ।