डा.अबुल हुसैन अन्सारी

आदरणीय केन्द्रीय पार्टी सभापति शेरबहादुर देउवाको अन्तिम कार्यक्रम यही स्थल (सुनसरी)बाट थियो । यो पवित्रभूमि यस्तो खालको हो जहाँ विश्वेश्वरप्रसाद कोइराला गिरिजाप्रसाद कोइरालाले देश र प्रजातन्त्र जोगाउनको लागि ठूलो संघर्ष गर्नुभएको थियो । सायद उहाँले पनि अन्तिम मन्तव्य यही ठाउँबाट राखेर जानु भा रहेछ । आज देशफेरि दलदलमा फस्दै छ । यो ठाउँबाटै फेरि बिगुल फुकिनेछ संसद र संविधानको रक्षा गर्नु हरेक नेपालीको कर्तव्य हो होइन भने यो देशलाई गृहमा फसाउने विदेशी चलखेल सुरु भइसकेको छ । संविधान जोगाउनको लागि अब आन्दोलन सुरु हुन्छ । त्यसमा जीएनजी पुस्ताहरू पनि सहभागी हुनेछ । सुनसरीका अधिकांश स्थानीय तह सरकारी कार्यालयहरूमा क्षति पु¥याएका छन् । यो क्षति पुर्‍याउने जीएनजी पुस्ता हुँदै होइन । रिसले देश जलेर खरानी भएको छ । अब यहि खरानी घसेर कति जनालाई साधु र महान बन्न छ समयले देखाउँछ । नेताले देश लुटे भन्नेले १ दिनमा देश खरानी बनाए अनि नपुगेर लुटपाटको ताण्डव मच्चाए, यस्ताले १ हप्ता मौका पाए आफ्नै घर लुट्न पनि बाँकी नराख्ने रहेछन् ।

आन्दोलनको माग पूरा भएर शीर्ष नेतालाई युवाहरूको हत्यामा मुद्दा दायर गर्न सकिने अवस्थामा पनि यत्रो नरसंहार मच्चिएको छ । यो भ्रष्टाचारविरुद्धको आन्दोलन होइन र यो विभिन्न तत्वसँग मिलेर आफ्नो रोटी सेक्ने दाउ हो । घुसपैठ भएपनि ती घुसपैठिया पनि नेपाली युवा हुन् । राष्ट्रको धरोहर दनदनी जल्दा त्यो रापले तन र मन नपोल्ने भविष्यका कर्णधार कसरी बन्न सक्छन् ? रगतको आहालमा खेल्ने सुरक्षा संयन्त्र त्यसको बदलाभन्दै जीवनभर सादगी जीवन बिताएकी शालिन नेता पत्नी जो प्रोफेसर समेत हुन् तिनलाई जिउँदो जलाउने प्रयास गर्ने, प्रहरी चौकी जलाएर पुलिसलाई जिउँदै मार्ने, जेलमा रहेका अपराधी भगाउने, मानिसका निजी सम्पत्ति खोजीखोजी जलाउने, बैंक लुट्ने समूह सबै नेपाली युवा हुन् भने मलाई आज नेपाली भन्न पनि लाज लागिरहेको छ ।

सिहंदरबार, राष्ट्रपति भवन यी नेताले मर्दा नामसारी गरेर लान्थे र ? त्यसमा त तपाईं हामी जो कोही को पनि बस्ने अधिकार थियो होइन ? हाम्रो भवन मात्र होइन हाम्रो विश्वास, ईतिहाँस र सान पनि सँगै जलेको छ । मीनबहादुर गुरुङ, हो उनी एमालेसँग निकट होलान् । उनले तपाईं हामीले कल्पना गर्न नसक्ने गरि दान गरेका छन् । हरेक विपदमा सहयोग गर्छन् । कैयन पटक टिचिङ अस्पताल जाँदा उनले बनाएका भवन देख्दा लाग्थ्यो उनलाई परमात्माले अझै दिउन र उनी यसरी नै सेवा गरि रहुन् ।

हजारौंले रोजगारी पाएको भाटभटेनी शून्यबाट शुरु भएको मीनबहादुर गुरुङको लगनको धरोहर हो, यो हाम्रा लागि प्रेरणा पनि हो । खैर, हामी उज्यालो भविष्य भन्दै ठूलो अन्धकारमा धकेलिएका छौं । यसको उत्तर सायद समयले दिनेछ । तारे होटल जलेका छन् । यसले हाम्रो छवि अन्तर्राष्ट्रिय समुदायमा कस्तो पर्छ ? यसको भरपाई कसरी हुन्छ ?

हाम्रो पर्यटन उठ्न नसक्ने गरि ढलेको छ । ध्वंस गर्न १ दिन काफी छ निर्माण गर्न अब अर्को पुस्ता लाग्छ, देश भनेको ईटा र सिमेन्टको धरोहर मात्र होइन ईतिहाँसको दस्तावेज पनि हो । पुनर्निर्माण पनि होला । आज हरेक नेपालीको आत्मवल डगमगाएको छ । सम्पत्ति त फेरि जोडिएला तर, मानिसका घर जल्दा थपडी मार्ने, युवतीहरू बसेका होस्टेलमा लछारपछार गर्ने संस्कार नेपालीको हो भने यो देश कुनै माईकालाल आएपनि बन्दैन । मान्छे नबन्ने समाज कहिँ पुग्दैन । मनमा प्रश्न त कति छन् कति तर, अहिले उब्जिएको सबैभन्दा ठूलो प्रश्न २ किलोमिटर पर रहेको हाम्रा राष्ट्रिय धरोहर दनदनी बल्दा नेपाली सेना किन निभाउन गएन ? पुलिस कहाँ थियोे ? १० बजेको साईत के का लागि कुरिरहेको थियो ? कसको आदेश कुर्दै थियो ? अनि आन्दोलनमा जान उक्साउने सेलिब्रेटी र ईन्फ्ल्युएनसरले यो भाडभैलोको जिम्मा लिन पर्छ कि पर्दैन ? अनि २० जना युवा मरे त्यो के हो भन्नुहोला ? हजुर अब यी सबपछि ती युवाको रगत खेर गएको छ किनकि उनीहरूको बिशुद्ध माग धुमिल भएको छ । उनीहरूलाई सम्झने फुर्सद छैन किनकि अब मुद्धा र ध्यान डाईभर्ट भयो, किनकि अराजकता यति हावी भयो कि ती अवोध युवाहरूको शहादत बिर्साउने गरि स्वार्थ समूह जुरमुराई सके । साँच्चै मनमा हजार प्रश्न त छदैछ त्योभन्दा बढी असहाय पीडा छ । थाहा छैन को कसले जिते तर, देशले हारेको छ आज । अब यो पुस्ताले माओवादीले हिंसा र उदण्ड मच्चाए भन्ने नैतिक अधिकार पनि गुमाएको छ । हामीले भ्रष्ट शासनको अन्त्य खोजेका हौ, देशलाई स्वाहा बनाएर कनून, विधि, मानवता, धरोहरको अन्तय गर्न होइन ।

मलाई थाहा छ, आज आन्दोलनको रापमा यति बोल्दा कति गालीको वर्षा र तिरस्कार खान्छु तर, जता हावा बग्यो उतै बहकिने मेरो आदत छैन, आफ्नो ब्रम्हले देखेको सत्य सधैं बोल्नेछु । त्यो पापी प्रकृतिसँग पनि रिस उठेको छ जो हिजो देश दनदनी बल्दा पानी बनेर बर्सिन पनि सकेन । म मरे पनि मेरो देश बाँची रहोस्, जय नेपाल ।

(सुनसरीबाट डा.अबुल हुसैन अन्सारी । उनी नेपाली कांग्रेसका नेता हुन् ।)