काठमाडौं । भारतीय प्रधानमन्त्री नरेन्द्र मोदीसँग राष्ट्रिय स्वतन्त्र पार्टी (रास्वपा)का सभापति रवि लामिछानेले भेटवार्ता गरेका छन् ।

बुधबार नयाँदिल्लीस्थित प्रधानमन्त्री कार्यालयमा मोदी र लामिछानेबीच भेट भएको हो । मोदी र लामिछानेबीच दुई देशबीचको विशेष र बहुआयामिक सम्बन्धलाई अझ उच्च तह पुर्‍याउने विषयमा सम्वाद भएको छ ।

लामिछानेसँगको भेटपछि मोदीले सामाजिक सञ्जालमार्फत भनेका छन्, ‘नेपालको राष्ट्रिय स्वतन्त्र पार्टीका अध्यक्ष श्री रवि लामिछानेसँग भेटेर खुशी लाग्यो । म उहाँको साझा र समृद्ध भविष्यका लागि नजिकसँग काम गर्ने चाहनालाई स्वागत गर्दछु र पूर्ण रूपमा साझा गर्दछु ।’

‘नेपाल हाम्रो छिमेकी प्रथम नीतिअन्तर्गत प्राथमिक साझेदार हो र हामी हाम्रो दुई देशबीचको विशेष र बहुआयामिक सम्बन्धलाई अझ उच्च तहमा पुर्‍याउन नयाँ सरकारसँग सहकार्य गर्न अपेक्षा गर्दछौँ,’ भारतीय प्रधानमन्त्री मोदीले भनेका छन् ।

रास्वपाका सभापति लामिछानेले भारतीय प्रधानमन्त्री मोदीसँग उत्पादकमूलक कुराकानीको बताएका छन् । लामिछानेले सामाजिक सञ्जालमार्फत भनेका छन्, ‘आज सम्माननीय प्रधानमन्त्री श्री नरेन्द्र मोदी जीसँग यति उत्पादक एक घण्टे कुराकानी गर्न पाउनु साँच्चै ठूलो खुशीको कुरा रह्यो । म नेपालको र भारतको भविष्यका लागि तपाईंको दृष्टिलाई साझेदार गर्छु जहाँ यी दुई देशहरूले विगतका सीमाहरूलाई पार गर्दै विकास कूटनीतिको नयाँ युगमा प्रवेश गर्नेछन् ।’

‘साझा सभ्यतागत सम्बन्ध, डिजिटल मार्गहरू, र सहज जडानमा केन्द्रित भएर, हामी साँच्चीकै प्रगति र आपसी विश्वासद्वारा परिभाषित साझेदारी निर्माण गर्न सक्छौं,’ लामिछानेले भने, ‘रास्वपा यी सम्भावनाहरूलाई नेपाल र भारतका जनताका लागि हाम्रो साझा समृद्धिका लागि वास्तविकतामा रूपान्तरण गर्न तत्पर छ ।’

भारत भ्रमणमा रहेका रास्वपाका सभापति लामिछानेले यसअघि भारतका गृहमन्त्री अमित शाह, परराष्ट्रमन्त्री डा.एस.जयशंकर र भारतीय जनता पार्टी (भाजपा)का अध्यक्ष नितिन नवीनसँग भेट गरिसकेका छन् । सांसदद्वय दीपक बोहरा र विपिनकिरण आचार्य तथा पत्नी निकिता पौडेललाई लिएर लामिछाने भारत भ्रमणमा छन् ।