लगनखेल । बागमती प्रदेशका युवा तथा खेलकुदमन्त्री मीनकृष्ण महर्जनले ललितपुर जिल्लाको दुर्गममा पर्ने बागमती गाउँपालिकाले राम्रो कार्यप्रगति गरेको भन्दै प्रशंसा गरेका छन् ।

सोमबार ललितपुरमा बागमती गाउँपालिका गाउँ सभाको १७औँ अधिवेशन तथा आर्थिक वर्ष २०८२/०८३ को वार्षिक नीति तथा कार्यक्रमको उद्घाटन कार्यक्रमलाई सम्बोधन गर्दै मन्त्री महर्जनले बागमतीका जनप्रतिनिधिहरूले राम्रो काम गरिरहेको बताए । उनले आगामी दिनमा पनि राम्रो काम गर्न आग्रह गरेका छन् ।

महर्जनले भने, ‘बागमती गाउँपालिकामा अहिलेसम्मकै उत्कृष्ट बजेट परेको छ । मैले योजना र बजेटहरू राखेको छु । बजेटलाई कार्यान्वयन गर्ने जिम्मेवारी तपाईहरूको हो ।’

बागमती गाउँपालिकाका अध्यक्ष वीरबहादुर लोप्चनले युवा तथा खेलकुदमन्त्री महर्जनको विशेष पहलमा बजेट र योजनाहरू परेको बताए । लोप्चनले मन्त्री महर्जनलाई विशेष धन्यवाद समेत दिएका छन् ।

मन्त्री महर्जनलाई गाउँपालिकाका अध्यक्ष लोप्चनका साथै जनप्रतिनिधि र कर्मचारीहरू लगायतले भव्य स्वागत गरेका थिए ।