खतिवडाद्वारा एमाले–माओवादीका युवाहरूलाई कांग्रेसमा स्वागत
काठमाडौं । नेपाली कांग्रेसका युवा नेता एवम् पूर्वसांसद रामहरि खतिवडाले एमाले र माओवादी केन्द्रका युवाहरूलाई कांग्रेसमा स्वागत गरेका छन् ।
ओखलढुंगाको सुनकोशी गाउँपालिका–२ नेपाली कांग्रेस गाउँ कार्यसमितिले शनिबार काठमाडौंमा आयोजना गरेको पार्टी प्रवेश कार्यक्रममा खतिवडाले आठ जना युवाहरूलाई कांग्रेसमा स्वागत गरेका हुुन् ।
कांग्रेस प्रवेश गर्नेमा अशोक सेङ्तान, पदम तामाङ, शंकर बिक, सोनाम तामाङ, गोपाल तामाङ, खिमराज तामाङ, कुमार तामाङ र चन्द्र तामाङ रहेका छन् ।
कार्यक्रमलाई सम्बोधन गर्ने क्रममा कांग्रेसका युवा नेता खतिवडाले माधव नेपालले नै एमाले परित्याग गरिसकेको बताउँदै नेता कार्यकर्ताले पनि एमाले छाड्ने बताए ।
कांग्रेसभित्र टुटफुट र गुट नभई एकजुट भएर जाने हो भने ओखलढुंगामा कांग्रेसलाई कसैले पनि हराउन नसक्ने खतिवडाले बताए ।
पार्टीको १४औँ महाधिवेशनलाई लक्षित गर्दै नेता खतिवडाले सक्षम नेताहरू छान्नका लागि एकजुट भएर लाग्न सम्पूर्ण नेता कार्यकर्तालाई आग्रह गरेका छन् ।
ओखलढुंगा कांग्रेसका सभापति प्रदीप सुनुवारले ओखलढुंगामा अन्य जिल्लाको जस्तो कृयाशील सदस्यताको विवाद नरहेको बताए ।
निर्धारित समयमा हुने अधिवेशनका लागि तयारी रहन नेता कार्यकर्तालाई उनले आग्रह गरेका छन् ।
फेसबुकबाट तपाईको प्रतिक्रिया