सार्वजनिक यातायातमा रोक लगाउने सरकारको निर्णय
काठमाडौं । काठमाडौं उपत्यकामा कोरोनाभाइरसको संक्रमणको जोखिम उच्च भएपछि सरकारले सार्वजनिक यातायात सञ्चालनमा पुनः रोक लगाएको छ ।
बालुवाटारमा सोमबार बसेको मन्त्रिपरिषदको बैठकले भदौ १५ गतेसम्म यातायात सञ्चालनमा पुनः रोक लगाउने निर्णय गरेको हो ।
कोभिड–१९ संकट व्यवस्थापन केन्द्र (सीसीएमसी)को सिफारिसमा सरकारले भदौ १ गतेदेखि शुरु गर्ने भनेको सार्वजनिक यातायात, शैक्षिक संस्था तथा अन्तर्राष्ट्रिय र आन्तरिक उडान पछि सार्ने निर्णय गरेको छ ।
काठमाडौं उपत्यकाका नगरपालिकाहरूका मेयरहरूको संगठन नगरपालिका मेयर फोरमले पनि यातायात रोक्न माग गरेका थिए । साथै उपत्यका प्रवेश गर्ने नाकामा पनि कडाई गर्ने निर्णय भएको छ ।
भदौ एक गते देखि सञ्चालनको तयारीमा रहेको अन्तर्राष्ट्रिय र आन्तरिक उडान पनि रोक लगाउने निर्णय भएको हो ।
कलकारखाना, उद्योग, निर्वाध रूपमा सञ्चालन भइ मजदुरहरूको दैनिक आवतजावत बढेकाले संक्रमणको जोखिम पनि बढेको भन्दै सरकारले उद्योग तथा कलकारखानाभित्र क्वारेन्टाइनको व्यवस्था गर्ने र स्वास्थ्य मापदण्ड पूरा गरेपछि मात्रै सञ्चालन गर्न दिने निर्णय गरेको छ ।
बैठकले सीमा नाकामा पनि अवैध आवतजावत जारी रहेको भन्दै थप कडाई गर्ने निर्णय गरेको छ ।
फेसबुकबाट तपाईको प्रतिक्रिया