चितवन । माओवादी केन्द्रका अध्यक्ष पुष्पकमल दाहाल ‘प्रचण्ड’ले आफू र केपी ओलीले अध्यक्ष र प्रधानमन्त्रीमा भन्दा सुशासन र देशको समृद्धि र राष्ट्रिय एकतामा ध्यान दिएको दाबी गरेका छन् ।

बिहीबार चितवन आइपुगेका अध्यक्ष प्रचण्डले प्रेस चौतारी र प्रेस सेन्टरले आयोजना गरेको संयुक्त पत्रकार सम्मेलनमा भने, ‘हामीले पटकपटक भनेका छौँ, अहिले अध्यक्ष र प्रधानमन्त्रीमा होइन् सुशासन र देशको समृद्धिमा ध्यान छ, राष्ट्रिय एकतामा ध्यान छ ।’

गृह जिल्ला चितवनमा ३ दिनका लागि विभिन्न कार्यक्रममा सहभागी हुन आइपुगेका प्रचण्डले पदको विषयमा विवाद छ नि भन्ने पत्रकारको प्रश्नको जवाफ दिदै भने, ‘पदको विषय विवादको रुपमा आएको छैन्, पार्टी एकता समायोजन समितिले दुई पार्टीका अध्यक्षका दुई वटा नेता भनेर पहिलो नै स्पष्ट पारेको छ ।’

दुई वटै नेतालाई समुचित भूमिका दिने कुरामा कुनै विमती र विवाद नभएका दावी गर्दै उनले वाम गठबन्धनको एकताको विषयमा कोही कसैले पत्रपत्रिका र मिडियामा बोल्न जरुरी नरेहेको बताए ।

प्रचण्डले भने, ‘पार्टी एकता बारेमा कोही कसैले पत्रपत्रिका मिडियामा बोल्न जरुरी छैन् । लिडरसिप लेभलमा गम्भीर छलफल भएको छ, फिफ्टीरफिफ्टीका कुरा अथवा यो रहन्छ वा त्यो रहँदैन् भन्ने कुरा गलत हुन् ।’

उनले प्रदेश राजधानी र प्रदेश प्रमुख सरकारले तोक्ने गरी पाँच पार्टीको बैठकले सहमति दिएको स्पष्ट पारे ।