लहानमा सकेट बम विष्फोट, दुईजना घाइते

सिरहा । सिरहा जिल्लामा सकेट बम विष्फोट हुँदा दुईजना घाइते भएका छन् ।

लहान नगरपालिका–१ स्थित लोकतन्त्रचोक छेउमा बेवारिसे अवस्थामा रहेको साईकलको सिटमुनी फिट गरेको सकेट बम बिष्फोटन हुँदा छर्रा लागेर दुईजना घाइते भएका हुन् ।

घाइते हुनेमा सप्तरीको खडक नगरपालिका–२ बनरझुल्ला बस्ने ४६ वर्षीय परमेश्वर चौधरी र सोही नगरपालिका–४ पनसेरा बस्ने ४४ वर्षीय धनराज चौधरी घाइते भएको प्रहरीले जनाएको छ ।

हात, खुट्टा, ढाड र कम्मरमा छर्रा लागेर सामान्य घाइते भएका उनीहरूलाई उपचारको लागि राउ स्मारक अस्पताल लहानमा लगिएको छ ।

घटनास्थलमा सकेटका टुक्राहरू तथा जनतान्त्रिक तराई मुक्ति मोर्चा (क्रान्तिकारी) जयकृष्ण गोइत नाम उल्लेख गरिएका पर्चा फेला परेको छ ।

Published : Thursday, 2017 December 14, 4:51 pm