काठमाडौं । गुन्डा नाइके राजीव गुरुङ उर्फ दीपक मनाङ्गेले एमालेबाट टिकट नपाएपछि मनाङ जिल्लामा प्रदेश सभाका लागि बागी उम्मेदवारी दिएका छन् ।

पार्टीबाट टिकट नपाएपछि नवप्रवेशी एमाले कार्यकर्ता मनाङ्गेले बागी उम्मदेवारी दिएका हुन् । मनाङ्गेले एमालेले आफूलाई धोका दिएको भन्दै अब एमालेका आधिकारिक उम्मेदवारलाई पराजित गरेर देखाइ दिने चेतावनी दिएका छन् ।

एमाले जिल्ला कमिटी मनाङले सर्बसम्मत उनलाई प्रदेश क्षेत्र नं. २ बाट सिफारिस गरेपनि स्थायी समितिले मनाङ्गेलाई टिकट दिएको थिएन ।

एमालेले टिकट नदिए पनि उनी एमालेको झण्डासहित एमालेका उम्मेदवारसँगै उम्मेदवारी दिन चामेस्थित मुख्य निर्वाचन अधिकृतको कार्यालय पुगेका थिए ।

मुख्य निर्वाचन अधिकृत एवं जिल्ला न्यायाधीश दीपक ढकालले राजीव गुरुङको स्वतन्त्र उम्मेदवारी परेको र मनोनयन दर्ता भएको बताएका छन् ।

गुन्डा नाइके मनाङ्गे केही साताअघि राप्रपा जिल्ला कार्य समितिका सवै सदस्यसहित एमालेमा प्रवेश गरेका थिए । मनाङ्गेले अहिले एमालेले धोका दिएको आरोप लगाउँदै आएका छन् ।