बारा । स्थानीय तहको निर्वाचन मिति नजिकिँदै गर्दा मध्य तराईका विभिन्न जिल्लाहरूमा अज्ञात समूहले बम विष्फोटका गतिविधिलाई तीब्र बनाएको छ ।

यसैक्रममा बारा जिल्लाका विभिन्न तीन स्थानमा अपरिचित समूहले श्रृङ्खलाबद्ध बम विष्फोट गराएको स्रोतले जनाएको छ । अपरिचित समूहले शनिबार बिहान ३ बजे कलैया उपमहानगरपालिका वडा नं. २३ को बखुइ बुथ केन्द्रमा बम विष्फोट भएको हो ।

जितपुर–सिमरा उपमहानगरपालिका वडा नं. १६ को काञ्जिया बुथ केन्द्रमा पनि शुक्रबार राति १० बजे अपरिचित समूहले बम विष्फोट गराएको छ ।

निजगढ नगरपालिकाको बजार क्षेत्रमा पनि शुक्रबार राति ९ बजे बम विष्फोट भएको छ । विष्फोटबाट कुनै पनि क्षति भएको छैन ।

बारा जिल्लामा भएका श्रृङ्खलाबद्ध भएका बम विष्फोटको कसैले पनि जिम्मेवारी लिएको छैन । बम विष्फोटबाट स्थानीयमा आतंक मच्चिएको स्थानीयहरूले बताए ।

प्रहरीले नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा)का कार्यकर्ताले बम विष्फोट गराएको हुन सक्ने अनुमान गरेको छ ।

बारा प्रहरीले उछृङखल गतिविधि गर्ने तथा बम विष्फोट गराउने समूहको खोजतलास भइरहेको भन्दै दोषीलाई हदैसम्मको कारबाही गर्ने चेतावनी दिएको छ ।

उता, प्रहरीले नेकपा रौतहटका जिल्ला सदस्य कारसाङ जिम्बाको घरमा खानतलासी गरेको छ । शुक्रबार राति पुगेको प्रहरीले जिम्बाको घरमा छापामारेको नेकपा रौतहटका जिल्ला इञ्चार्ज विजयलाल सिंहले जानकारी दिनुभयो ।