काठमाडौं । ८८ किलो सुनका थप आरोपीहरूलाई महानगरीय प्रहरीले पाँच जनालाई पक्राउ गरेको छ । पक्राउ पर्नेमा भारतीय र नेपाली नागरिक छन् ।

भदौ १९ क्षेत्रपाटीमा पार्किङ गरी राखेको बा. १७ च. ६४२७ नं. को गाडीको खानतलासी गर्दा ८८ के.जी. सुन बरामद भएको थियो । प्रहरीले सुनको असली मालिक र मतियारहरूको खोजतलास गर्दै आएको छ ।

भन्सार ऐन २०६४ विपरित संगठित भई अवैध तवरले भन्सार छली सुन ओसारपसार गरेको संगठित अपराध मुद्दाको अनुसन्धान गर्दै जाने क्रममा चिनियाँ नागरिक पान विमिङ र यान वेबेङको संलग्नता रहेको खुलेको थियो । उनीहरू फरार छन् ।

नेपालका केही सुन व्यवसायीहरूको संलग्नता रहेको अनुसन्धानबाट खुल्न आएपछि ती व्यक्तिहरूको खोजतलास एवम् अनुसन्धान गर्ने क्रमामा असोज २ गते साढे एक बजे उपत्यकाका विभिन्न स्थानहरूबाट पाँचजना सुन व्यवसायीहरू पक्राउ परेको महानगरीय प्रहरी टेकुद्वारा जारी प्रेस विज्ञप्तिमा उल्लेख छ ।

पक्राउ पर्नेमा दार्चुला जिल्लाको काँटे गाउँपालिका वडा नं.३ घर भई हाल काठमाडौंको न्यूरोडस्थित रञ्जना कम्प्लेक्समा कार्यविनायक सुनचाँदी गहना पसल सञ्चालन गरी बस्ने ४२ वर्षीय गणेशदत्त वडु रहेका छन् । उनको पसलबाट १० लाख ८२ हजार नेपाली रुपियाँ, ८ हजार भारतीय नोट, अमेरिकन डलर १ हजार १ सय पनि बरामद भएको छ।

भारतको महाराष्ट्र साङली जिल्ला आठपाडी थाना घर भई हाल ओटुमा पशुपति सुन चाँदी खार्नी पसल सञ्चालन गरी बस्ने ३८ वर्षीय नन्दकुमार मर्गलाई पनि पक्राउ गरिएको छ ।

त्यसैगरी भारतको महाराष्ट्र साङली जिल्ला आठपाडी थाना घर भई हाल काठमाडौंको ओटुमा सिद्धनाथ सुनचाँदी खार्नी पसल सञ्चालन गरी बस्ने ५८ वर्षीय उल्लास दिनकर सालुखे पनि पक्राउ परेको प्रहरीले जनाएको छ ।

पक्राउ पर्नेमा काठमडौं महानगरपालिका– २५ वाङ्गेमुढा घर सोही स्थानमा शाक्य सुनचाँदी पसल सञ्चालन गरी बस्ने ५९ वर्षीय शुभरत्न शाक्य पनि पक्राउ परेका छन् । उनको सुनचाँदी पसलबाट १ एक करोड४२ लाख नगद, १ के.जी. २०९ ग्राम सुन, चाँदीको सिक्का २ हजार ४ सय ७८ ग्राम फेला परेको छ ।

भारतको विहार मधुवनी जिल्ला जयनगर थाना घर भई काठमाडौंको नरदेवीमा रविश्या ट्रेडर्स सञ्चालन गरी बस्ने ५९ वर्षीय सत्यनारायण अग्रवाल पनि पक्राउ परेका छन् । उनको डेरा कोठा खानतलासी गर्दा नेपाली रुपियाँ १३ लाख ५० हजार नगद बरामद भएको छ ।