काठमाडौं । नेपाली कांग्रेसका नेता एवम् पूर्वप्रधानमन्त्री शेरबहादुर देउवाले गोपालमान श्रेष्ठको निधनको खबरले आफू स्तब्ध भएको बताएका छन् ।

मंगलबार सामाजिक सञ्जालमार्फत देउवाले श्रेष्ठको निधनप्रति गहिरो दुःख व्यक्त गरेका छन् । देउवाले शोकमा रहेका परिवारजनप्रति समवेदना र स्व.श्रेष्ठलाई श्रद्धाञ्जलि व्यक्त गरेका छन् ।

देउवाले भनेका छन्, ‘नेपाली कांग्रेसका नेता, पूर्वउपप्रधानमन्त्री एवं मेरा मित्र गोपालमान श्रेष्ठजीको निधनको खबरले स्तब्ध भएको छु । उहाँको आत्माको चीरशान्तिको कामना गर्दै शोकसन्तप्त परिवारजनप्रति गहिरो समवेदना व्यक्त गर्दछु ।’

‘नेपालको लोकतान्त्रिक आन्दोलनमा उहाँले निभाउनु भएको अग्रणी भूमिका सधैं स्मरणीय रहनेछ,’ पूर्वप्रधानमन्त्री देउवाले भनेका छन् ।

कांग्रेस नेता श्रेष्ठको मंगलबार साउन १२ गते ललितपुरको हेलिस अस्पतालमा उपचारका क्रममा निधन भएको छ । ८३ वर्षीय श्रेष्ठले क्यान्सर रोगको उपचार गराउँदै आएका थिए ।

बुधबार साउन १३ गते श्रेष्ठलाई पशुपति आर्यघाटमा अन्तिम दाहसंस्कार गरिने कार्यक्रम रहेको छ ।