काठमाडौं । गगन थापाको हाइज्याकमा परेको नेपाली कांग्रेसको छायाँ सरकारको बैठक बसेको छ ।

शनिबार सिंहदरबारस्थित कांग्रेस संसदीय दलको कार्यालयमा नेता भीष्मराज आङदेम्बेको अध्यक्षतामा मन्त्रालयगत जिम्मेवारी पाएका संयोजकहरूको बसेको छ ।

बैठकमा सरकारको काम कारबाही र कांग्रेसको भावी रणनीतिका विषयमा छलफल भएको छ । झुण्डै दुईतिहाइको बहुमतको राष्ट्रिय स्वतन्त्र पार्टी (रास्वपा)को सरकारले एक सय दिनमा गरेका राम्रा कामहरू सार्वजनिक भएरहेका बेला कांग्रेसले बनाएको छायाँ सरकारका मन्त्रीहरूको बैठक पनि बसेको छ ।

भुकृटीमण्डप भेलाबाट कथित विशेष महाधिवेशनको नामबाट गगनले नेपाली कांग्रेसलाई हाइज्याक गरेर सभापति बनेका छन् । निर्वाचन आयोग र सर्वोच्च अदालतबाट कांग्रेसको मान्यता पाएका गगनले निर्वाचनमा कांग्रेसलाई लज्जाजनक अवस्थामा हराइदिएका छन् ।

निकै कमजोर बनेको कांग्रेसले झण्डै दुईतिहाइको रास्वपा नेतृत्वको सरकार र प्रधानमन्त्री बालेन्द्र शाह (बालेन)को कामहरूबाट डराएको छ । सरकारले जनताको पक्षमा धमाधम कामहरू गरिरहेको छ ।

सरकारलाई अफ्ठ्यारो पार्न र सरकार तथा प्रधानमन्त्री एवम् मन्त्रीहरूको स्वाद फेर्न कांग्रेसले आफ्ना सांसदहरूलाई छायाँ प्रधानमन्त्री र छायाँ मन्त्रीहरू बनाएको छ ।

गगनले निर्वाचनका बेला आफूलाई भावी प्रधानमन्त्रीको उम्मेदवार घोषणा गरेका थिए । सर्लाही ४ बाट उम्मेदवार बनेका गगन थापा १२ हजार भन्दा धेरै मतको अन्तरबाट पराजित भएका थिए । चुनावको बेला गगनले अबकि बार गगन सरकार, अबकि बार १०० पार भन्ने जस्ता नारा लगाएका थिए । प्रधानमन्त्री र सरकार बनाउने कुरा त पाँच वर्षलाई तुहियो । तर, गगनले छायाँ सरकार, छायाँ प्रधानमन्त्री र छायाँ मन्त्रीहरू बनाएर रहर फेरेका छन् ।