विराटनगर । सुनसरीको देवानगञ्ज घटनाको विरोधमा प्रदर्शनमा उत्रिएका मोरङका प्रदर्शनकारीले प्रधानमन्त्री बालेन्द्र शाह (बालेन)विरुद्ध नाराबाजी गर्दै राजीनामा माग गरेका छन् ।

बिहीबार जिल्ला प्रशासन कार्यालय, मोरङअगाडि पुगेका प्रदर्शनकारीले ‘बालेन सरकार’विरुद्ध नाराबाजी गरेका हुन् । विश्व हिन्दू परिषद्को अगुवाइमा विभिन्न हिन्दुवादी संघ संगठनका प्रतिनिधिहरू विरोध जुलुसमा सहभागी छन् ।

हनुमान मन्दिरअगाडिबाट शुरु भएको प्रदर्शन जिल्ला प्रशासन कार्यालयको गेट अगाडिसम्म पुगेको छ । प्रदर्शनकारीले सुनसरी घटनाको निष्पक्ष छानबिन र दोषीलाई कारबाही गर्ने विषयमा सरकारको पहल नदेखिएको आरोप लगाएका छन् ।

प्रदर्शनकारीले ‘बालेन सरकार मुर्दावाद’ र ‘दोषीलाई कारबाही गर’ भन्दै नाराबाजी गरेका छन् ।

प्रदर्शनकारीलाई अगाडि बढ्न नदिन प्रशासन परिसर आसपास ब्यारिकेट खडा गरिएको छ । शान्ति सुरक्षा कायम गर्न विराटनगर क्षेत्रमा सुरक्षा तैनाथी बढाइएको छ ।

आइतबार राति साउन १० गते सुनसरीको कप्तानगञ्जमा दुई फरक समुदायबीच भएको झडपमा २४ वर्षीय ओमप्रकाश मेहताको मृत्यु भएपछि तराईका विभिन्न जिल्लाहरूमा विरोध प्रदर्शन भइरहेका छन् ।

यसैबीच, हिन्दू सम्राट नेपाल जिल्ला कार्यसमिति, मोरङले प्रमुख जिल्ला अधिकारीमार्फत प्रधानमन्त्रीलाई ज्ञापनपत्र पठाई दोषीलाई कारबाही गर्न माग गरेको छ । विराटनगर क्षेत्रमा विरोध प्रदर्शनहरू भइरहेका छन् ।