काठमाडौं । नेपाली कांग्रेसका नेता एवम् नेपाल तरूण दलका पूर्वअध्यक्ष जीतजंग बस्नेतले गगन थापाको खुट्टामा वीपीको नभइ भद्रकालीको जुत्ता रहेको बताएका छन् ।

बुधबार देउवा समूहले काठमाडौंमा आयोजना गरेको वीपी स्मृति दिवस कार्यक्रममा सम्बोधन गर्दै नेता बस्नेतले गगनले भद्रकालीको जुत्ता लगाएको बताएका हुन् । नेता बस्नेतले मुलुकमा सैनिक शासनको अनुभूति हुन थालेको संकेत गर्दै सांकेतिक रुपमा सेना अर्थात् भद्रकालीको कुरा गरेका हुन् ।

‘भोलिका दिनमा इतिहासले प्रश्न उठाउने छ– कांग्रेसको विशेष महाधिवेशनलाई मान्यता लिदाउन न्यायालय र निर्वाचन आयोगलाई जे जे गर्नुभयो,’ नेता बस्नेतले भने, ‘सर्वोच्चकी न्यायाधीश सपना मल्ललाई नि भन्न चाहन्छु– उहाँले भन्नु भएछ– बाघले अरूलाई पनि खान्छ । पहिला हामीलाई खाइसकेको थियो, आज बाघले न्यायालय खाइसकेको छ ।’

कांग्रेसको आधिकारिकता विवादमा गगन समूहलाई मान्यता दिइएकोमा नेता बस्नेतले असन्तुष्टि जनाएका छन् ।

नेता बस्नेतले राष्ट्रपति रामचन्द्र पौडेलको भूमिकाप्रति पनि असन्तुष्टि जनाएका छन् । कांग्रेसलाई विभाजन गराउन राष्ट्रपति पौडेलको पनि भूमिका रहेको उनले बताए ।