काठमाडौं । राष्ट्रिय स्वतन्त्र पार्टी (रास्वपा)को झण्डै दुईतिहाइको सरकार बनेको करीव ४ महिनामा आत्मदाहको प्रयास गरेका गणेश नेपालीको निधन भएको छ ।

शुक्रबार उपचारका क्रममा वीर अस्पतालमा गणेशको निधन भएको जिल्ला प्रहरी परिसर काठमाडौंका प्रवक्ता एसपी पवन भट्टराईले बताएका छन् । गणेशको निधन भएपछि वीर अस्पतालमा सुरक्षा अवस्था बलियो बनाइएको छ । गणेशका आफन्त र शुभेच्छुकहरू वीर अस्पतालमा जम्मा भएका छन् ।

देशमा सुधार हुन्छ कि भनेर जनताले झण्डै दुईतिहाइको बहुमत दिएर रास्वपालाई सत्तामा पु¥याइदिएका छन् । रास्वपाबाट राहत हुने अपेक्षा लिएका जनताले आत्मदाह गर्ने अवस्था आएपछि प्रधानमन्त्री बालेन्द्र शाह (बालेन) र रास्वपाविरुद्ध आक्रोश बढेको छ ।

बिहीबार दिउँसो १ः४५ बजे काठमाडौंको त्रिपुरेश्वरस्थित राहदानी विभाग अगाडि गणेशले आत्मदाहको प्रयास गरेका थिए ।

२५ वर्षीय गणेश मुगुको सोरु गाउँपालिका वडा नं. १ घर भई हाल भक्तपुरमा श्रीमती र एक छोरी सहित बस्दै आएका थिए । उनी पेसाले राइड सेयरिङ थिए ।

बिहीबार दिउँसो त्रिपुरेश्वरमा बाइक रोकेका बेला काठमाडौं महानगरपालिकाको नगर प्रहरीले मोटरसाइकलमा ‘ह्वील लक’ गरिदिएपछि गणेशले आफ्नै शरीरमा पेट्रोल खनाएर आत्मदाहको प्रयास गरेका थिए ।