भरतपुर । राष्ट्रिय स्वतन्त्र पार्टी (रास्वपा)को महामन्त्रीमा विपिनकुमार आचार्य निर्वाचित भएका छन् ।

शुक्रबार भरतपुरमा सम्पन्न पदाधिकारीहरूको मतगणनामा आचार्य महासचिवमा निर्वाचित भएका हुन् । महामन्त्री पदमा आचार्य, मनीष झा, सागर ढकाल र गणेश कार्कीबीच प्रतिस्पर्धा भएको थियो ।

महामन्त्रीमा उम्मेदवारी दिएका गणेश पराजुली, राजु पाण्डे, कबिन्द्र बुर्लाकोटी, जगदीश खरेल, रञ्जु दर्शना र प्रमोद न्यौपानेले विपिनलाई समर्थन गर्दै उम्मेदवारी फिर्ता लिएका थिए ।

आचार्य यसअघि रास्वपाको सहमहामन्त्री थिए । दाङ क्षेत्र नं. २ बाट प्रतिनिधि सभा सदस्य (सांसद)मा निर्वाचित भएका आचार्यले एमालेका महासचिव शंकर पोखरेललाई हराएका हुन् ।

निर्वाचित भएलगत्तै उनले ३ दिनको महाधिवेशन व्यवस्थापकीय कमजोरीका कारण ५ दिनभन्दा बढी समय लागेको भन्दै माफी पनि मागेका छन् ।

नवनिर्वाचित महामन्त्री आचार्यले नेपाली जनताले रास्वपालाई चुनावमा दिएको जिम्मेवारी पूरा गर्न आफू खरो रुपमा उत्रिने पनि बताएका छन् । उनले भने, ‘नेपाली जनताले जुन अपेक्षा राखेको छ त्यसमा खरो उत्रिएर जिम्मेवारी पूरा गर्नेछु । विधिसम्मत तरिकाले नागरिकप्रति उत्तरदायी हुने गरी भूमिका खेल्नेछु ।’

‘महामन्त्रीका रुपमा पार्टीमा इमान्दार योद्दाको रुपमा मलाई धेरैले देख्न सक्नेछ । जहाँ विधि, पारदर्शीता र ऐक्यवद्धतातर्फ लैजान मेरो भूमिका रहन्छ,’ उनले भने ।