रुकुम पश्चिममा जन्ती बोकेको जीत दुर्घटना, चारको मृत्यु
आठबीसकोट । रुकुम पश्चिम जिल्लाको पोखरामा जीप दुर्घटना हुँदा चार जनाको मृत्यु भएको छ ।
शुक्रबार राति आठ बजे आठबीसकोट नगरपालिका–७ को पोखरामा जन्ती बोकेको जिप दुर्घटना हुँदा चार जनाको मृत्यु भएको प्रहरीले जनाएको छ । दुर्घटनामा एक जना घाइते भएका छन् ।
घारीखोलाबाट जन्ती लिएर आठबीसकोट–८ दाँजेतर्फ जाँदै गरेको रा १ ज ५८९ नम्बरको जीप दुर्घटना हुँदा चार जनाको घटनास्थलमै मृत्यु भएको प्रहरीले जनाएको छ ।
आठबीसकोट–८ का अन्दाजी ५१ वर्षीय गोरे नेपाली, ६६ वर्षीय सार्के नेपाली, ४८ वर्षीय आइते चदारा र सोही नगरपालिका–७ का ५१ वर्षीय कलिभान नेपालीको मृत्यु भएको जिल्ला प्रहरी प्रमुख डीएसपी ठगबहादुर केसीले जानकारी दिए ।
दुर्घटनामा ६० वर्षीय लालबहादुर नेपाली सख्त घाइते रहेको डिएसपी केसीले बताएका छन् ।
रोकेर यात्रु ओरालिरहेको गाडी एक्कासि पछि सरेर दुर्घटना भएको प्रत्यक्षदर्शीले बताएका छन् । (फाइल तस्बिर)
फेसबुकबाट तपाईको प्रतिक्रिया