नेकपाका वडाध्यक्ष र सदस्यहरू राजपामा प्रवेश, राजकिशोरद्वारा स्वागत
लहान । सिरहामा सत्तारुढ नेपाल कम्युनिष्ट पार्टी (नेकपा) बाट निर्वाचित वडाध्यक्षसहित झण्डै दुई सयबढी नेता तथा कार्यकर्ता राष्ट्रिय जनता पार्टी नेपाल (राजपा) मा प्रवेश गरेका छन् ।
सिरहाको कर्जन्हा नगरपालिका वडा ४ मा तत्कालीन माओवादीबाट निर्वाचित वडाध्यक्ष टेकबहादुर लामा र चार जना वडा सदस्यसहित दुई सय बढी नेता तथा कार्यकर्ताले नेकपा छाडेर राजपामा प्रवेश गरेका हुन् ।
राजपामा नेपाली कांग्रेसबाट वडाध्यक्षमा प्रत्यासी बनेका सहितका नेता तथा कार्यकर्ताहरू पनि प्रवेश गरेका छन् ।
राजपा नेपालका नेता एवम् प्रतिनिधि सभाका सांसद राजकिशोर यादवले उनीहरूलाई पार्टीमा भित्र्याएका हुन् ।
कर्जन्हा नगरपालिकामा शुक्रबार बिहान आयोजित कार्यक्रममा यादवले उनीहरूलाई सामूहिक रुपमा पार्टी प्रवेश गराएका छन् ।
राजपाका नेता यादवले अब पुरानो ढर्राको राजनीतिले देशमा समृद्धि सम्भव नरहेको बताए । उनले नयाँ सोँच र भिजनसहित अघि बढेको राजपा मात्र विकल्पका रुपमा आएको बताए ।
कम्यनिष्ट पार्टीबाट राजनीति शुरु गरेर जीवन बिताएका व्यक्ति राजपालाई बुझेर आएकोमा वडाध्यक्ष लामासहित नवप्रवेशीलाई नेता यादवले धन्यवाद दिएका थिए ।
राजपा प्रवेश गरेका वडाध्यक्ष लामाले जनताको मुक्ति र देश परिवर्तनको नारा दिएर विगत १० वर्षे जनयुद्ध लडेको पार्टी सरकारमा भएपनि जनताका पक्षमा काम गर्न नसकेको आरोप लगाए ।
वडाध्यक्ष लामा सिरहामा कम्युनिष्ट आन्दोलनका धरोहर मानिन्छन् । कम्युनिष्टको गढ मानिने कर्जन्हा क्षेत्रमा चलेको राजपा प्रवेशको लहरले यस क्षेत्रको राजनीतिक वृतमा हलचल मचाएको छ ।
फेसबुकबाट तपाईको प्रतिक्रिया