काठमाडौं । नेपाली कांग्रेसको महासमिति बैठकको लागि तयारी शुरु भएको छ । देशका सबै जिल्लाबाट आउने महासमिति सदस्यहरूको स्वागतका लागि काठमाडौं उपत्यका दुलही झै सिंगारिएको छ ।

काठमाडौंको रामशहापथस्थित योगम्बर पार्टी प्यालेसमा कांग्रेसको महासमिति बैठक हुनेछ । बैठकका लागि सबै तयारी गरिएको छ ।

महासमिति बैठकमा करीव १ करोड खर्च हुने अनुमान गरिएको छ । कांग्रेसका प्रवक्ता विश्वप्रकाश शर्माले महासमिति बैठकका लागि काठमाडौं जिल्लाका सभापति सबुज बानियाँलाई तयारी समितिको संयोजक तोकिएको जानकारी दिए ।

पार्टी मुख्यालय सानेपामा मंगलबार आयोजित पत्रकार सम्मेलनमा प्रवक्ता शर्माले महासमिति बैठक तोकिएको समयभित्र हुने जानकारी दिए ।

‘महासमितिको बैठक रामशहापथस्थित योगम्बर पार्टी प्यालेसमा हुनेछ’, उनले भने, ‘धमाधम तयारी भएको छ । देश र विदेशबाट प्रतिनिधिहरू आउने क्रम शुरु भैसकेको छ ।’

महाधिवेशन प्रतिनिधिहरूको स्वागतका लागि काठमाडौंका प्रमुख चोक र सडकहरूमा नेपाली कांग्रेसको झण्डा राखिएको छ । कांग्रेसको चारतारे झण्डाले महासमिति बैठकमा आउने सदस्यहरूको स्वागत गरिनेछ ।

महासमिति बैठकमा नेपाली कांग्रेसको विधान संशोधनको प्रस्ताव पेश हुनेछ । बैठकमा राजनीतिक र आर्थिक प्रतिवेदनहरू पेश हुनेछन् ।

कांग्रेसले आर्थिक प्रतिवेदनलाई सुझावसहित पारित गरिसकेको छ । राजनीतिक प्रतिवेदनमा छलफल जारी छ ।

महासमिति बैठक मंसिर २८ देखि पुस ३ गतेसम्म हुनेछ ।