कांग्रेस सांसद प्रसाइँद्वारा झापा-ईटहरी रेलमार्ग जग्गाको मुआब्जा र दुधको भुक्तानी दिन माग
काठमाडौं । नेपाली कांग्रेसकी सांसद सरिता प्रसाइँले रेलमार्गका लागि अधिग्रहण भएको जग्गाको मुआब्जा र किसानको दुधको भुक्तानी दिन माग गरेकी छिन् ।
बिहीबार बसेको प्रतिनिधिसभाको बैठकमा शून्य समयमा बोल्दै सांसद प्रसाइँले झापा–ईटहरी रेलमार्गको नाममा सर्वसाधारणको जग्गा अधिग्रहण गरेर मुआब्जा नदिएको भन्दै छिटो मुआब्जा दिन माग गरिन् ।
उनले भनिन्, ‘यसपालि १८ खर्ब ६० अर्बको बजेट आएको छ । तर, झापादेखि ईटहरीसम्म रेलमार्ग बनाउने भनेर जनताको जग्गा सरकारले अधिग्रहण गरेको छ ।’
‘यसको मुआब्जा पनि दिएको छैन । र, जनताले हाम्रो मुआब्जा दिने की ? हाम्रो जग्गा फिर्ता गर्ने भनेर प्रश्न गरेका छन्’, सांसद प्रसाइँले भनिन् ।
सांसद प्रसाइँले किसानले उत्पादन गरेको दुधको मूल्य समयमा नपाएको भन्दै चिन्ता जनाएकी छिन् । उनले छिटोभन्दा छिटो दुधको भुक्तानी दिन माग गरेकी छिन् ।
उनले भनिन्, ‘कृषि प्रधान देश भनियो । कृषकले दुध उत्पादन गरे । त्यो दुध बेचेको पैसा अहिलेसम्म सरकारले भुक्तानी गर्न सकेको छैन ।’
‘यो पैसा कहिले भुक्तानी हुन्छ ? यसपालि भुक्तानी हुन्छ की हुँदैन ? कृषकहरूले सोधेका छन्’, सांसद प्रसाइँले भनिन् ।
उनले भनिन्, ‘सुखी नेपाली, समृद्धि नेपाले होइन सुखी सरकार दुःखी जनता हो की भन्ने दिन नआओस् भनेर प्रश्न गर्न चाहन्छु ।’
फेसबुकबाट तपाईको प्रतिक्रिया