काठमाडौं । नेपाल प्रहरीका दुई जना प्रहरी नायव महानिरीक्षक (डीआईजी)हरू उमेशराज जोशी र भीमप्रसाद ढकाललाई सरकारले प्रहरी अतिरिक्त महानिरीक्षक (एआईजी) पदमा बढुवा गरेको छ ।

बिहीबार सिंहदरबारमा बसेको मन्त्रिपरिषद बैठकले जोशी र ढकाललाई एआईजी पदमा बढुवा गरी पदस्थापना गर्ने निर्णय गरेको सञ्चार, सूचना तथा प्रविधिमन्त्री रेखा शर्माले बताइन् ।

एआइजी पदमा बढुवा जोश र ढकाल आइजीपी हुन पाउनेछैनन् । उनीहरू उमेर हदका कारण अनिर्वाय अवकासमा जानेछन् ।

यसैबीच, सरकारले अन्तर्राष्ट्रियस्तरको क्रिकेट, कराँते, तेक्वान्दो र कबड्डी प्रतियोगितामा विजेता तथा पदक प्राप्त खेलाडी, प्रशिक्षक तथा व्यवस्थापक गरी जम्मा ४२ जनालाई पुरस्कार तथा सम्मान गर्ने निर्णय गरेको छ ।

सरकारले सरकारको आगामी वर्षको नीति तथा कार्यक्रम जेठ १ गते ३ बजे प्रस्तुत गर्ने निर्णय गरेको मन्त्री शर्माले बताइन् ।

सरकारले समाजकल्याण परिषदको उपाध्यक्ष पदमा नन्दलाल माझी (सुनसरी)लाई मनोनयन गरेको छ ।

भाषा आयोगको सदस्यमा सुरेश मानन्धर (काठमाडौं)लाई नियुक्त गरिएको मन्त्री शर्माले बताइन् ।