काठमाडौं । बलत्कार मुद्दामा दोषी ठहर भएका सन्दीप लामिछानेको मुद्दा हेर्न नमिल्नेमा परेको छ ।

उच्च अदालत पाटनमा लामिछानेको मुद्दाको आइतबारको सुनुवाई स्थगित भएको छ । न्यायाधीशद्वय नृपध्वज निरौला र दुर्गाप्रसाद ढुंगेलको संयुक्त इजलासमा लामिछानेको मुद्दा परेको थियो ।

न्यायाधीश निरौलाले विपक्षी झिकाउने आदेश गरेकाले हेर्ने नमिल्ने भएको सूचना अधिकारी तीर्थराज निरौलाले बताएका छन् ।

लामिछानेलाई बलात्कार मुद्दामा जिल्ला अदालत काठमाडौंले दोषी ठहर गरेको थियो । आफूले पहिल्यै सुनुवाइ गरी धारणा व्यक्त गरिसकेको मुद्दामा अर्को पटक न्यायाधीशहरूले सुनुवाइ गर्दैनन् ।

लामिछानेविरूद्ध अधिकतम सजाय माग गरी उच्च सरकारी वकिलको कार्यालय पुनरावेदनमा गएको थियो । लामिछानेले पनि आफूले सफाइ पाउनुपर्ने जिकिर गर्दै पुनरावेदन दिएका छन् । दुबैको मागलाई उच्च अदालतले एक ठाउँमा राखेर हेरेको छ ।

पुस १३ गते जिल्ला अदालत काठमाडौंका न्यायाधीश शिशिर ढकालको इजलासले बलात्कार मुद्दामा लामिछानेलाई दोषी ठहर गरेको थियो । न्यायाधीश ढकालको पुस २५ गतेको इजलासले लामिछानेलाई ८ वर्ष कैद सजाय, तीन लाख रुपियाँ जरिवाना र पीडितलाई दुई लाख रुपियाँ क्षतिपूर्ति भराउन पनि आदेश गरेको थियो ।

जिल्ला अदालत काठमाडौंले लामिछानेलाई सजाय कम दिएको भन्दै उच्च सरकारी वकिल कार्यालयले फागुन २९ गते मंगलबार उच्च अदालत पाटनमा पुनरावेदन दिएको थियो ।

त्यसअघि सन्दीप लामिछानेले पनि जिल्ला अदालतले आफूलाई बलात्कार मुद्दामा दोषी ठहर गरेको विपरीत उच्च अदालत पाटनमा पुनरावेदन दिएका थिए । लामिछानेले थुना बाहिर बसेर पुनरावेदन गर्ने सुविधा पाएका थिए । विभिन्न कारणले लामिछानेको मुद्दा पटक पटक सर्दै आएको छ ।