काठमाडौं । हिन्दुहरूको साझा संस्था विश्व हिन्दु महासंघले कानून तथा न्यायको क्षेत्रबाट सनातन हिन्दु धर्मको संरक्षण एवं प्रवर्धनमा योगदान पुर्‍याएको भन्दै अधिवक्ता अर्जुन खड्कालाई सम्मान गरेको छ ।

महासंघले आफ्नो ४४औँ स्थापना दिवसका अवसरमा बुधबार काठमाडौंमा आयोजित विशेष समारोहमा अधिवक्ता खड्कालाई सम्मान गरेको हो ।

राप्रपाका पूर्वअध्यक्ष पशुपतिशम्शेर जबरा र महासंघकी अध्यक्ष अस्मिता भण्डारीले अधिवक्ता खड्कालाई कदरपत्रसहित सम्मान गरेका छन् ।

उदयमान कानून व्यवसायी खड्का कानून र न्यायको क्षेत्रबाट हिन्दु धर्मको पक्षमा क्रियाशील छन् । उनले विश्व हिन्दु महासंघलाई कानूनी सहायता एवं परामर्श दिँदै आएका छन् ।

महासंघकी कार्यवाहक अध्यक्ष भण्डारीले संस्थाको प्रमुख उद्देश्य सनातन हिन्दु धर्मको प्रवर्धन गर्दै मुलुकलाई हिन्दु अधिराज्य बनाउने भएको बताइन् ।

राप्रपाका नेता जबराले देशमा हिन्दु राष्ट्र पुनर्स्थापना भएरै छोड्ने बताएका छन् ।

सम्मानित भएपछि सामाजिक सञ्जालमार्फत अधिवक्ता खड्काले देशैभरका सनातन स्वधर्मसँग सम्बन्धित संस्थाहरूलाई निःशुल्क कानूनी परामर्श दिने घोषणा पनि गरेका छन् ।

४४ वर्षअघि स्थापित विश्व हिन्दु महासंघको विश्वका तीन दर्जन मुलुकमा आफ्नो शाखा रहेको छ ।