काठमाडौं । नेपालका लागि भारतीय राजदूत नवीन श्रीवास्तवले परराष्ट्रमन्त्री नारायणकाजी श्रेष्ठ र अर्थमन्त्री वर्षमान पुनसँग अलग अलग भेटवार्ता गरेका छन् ।

बिहीबार सिंहदरबारमा राजदूत श्रीवास्तवले परराष्ट्रमन्त्री श्रेष्ठ र अर्थमन्त्री पुनसँग भेट गरेर कार्यकालको बधाइ दिएका हुन् ।

भेटमा राजदूत श्रीवास्तवले मन्त्रीद्वय श्रेष्ठ र पुनसँग नेपालमा भएको सत्ता समीकरणको परिवर्तन नेपालको आन्तरिक मामिला भएको बताएका छन् । श्रीवास्तवले सत्ता समीकरणबाट भारतले नेपालप्रतिको धारणामा परिवर्तन नगर्ने बताएका छन् ।

भारतीय राजदूत श्रीवास्तवले परराष्ट्रमन्त्री श्रेष्ठसँग द्विपक्षीय आपसी हितका विविध विषयमा छलफल गरेको परराष्ट्र मन्त्रालयका प्रवक्ता अमृतबहादुर राईले बताएका छन् ।

श्रीवास्तव र श्रेष्ठबीच दुई देशबीचको सम्बन्ध थप सुदृढ बनाउने, भारतको सहयोगमा नेपालमा सञ्चालित विकास निर्माणका परियोजना समयमै सम्पन्न गर्नेलगायत विषयमा छलफल भएको प्रवक्ता राईले बताए ।